Médiku kubano 16 konklui ona misaun iha TL
DILI, 19 juñu 2023 (TATOLI) – Hospitál Naisonál Guido Valadares (HNGV) hato’o despedida ba médiku espesialista kubano hamutuk 16 ne’ebé remata ona misaun iha Timor-Leste.
“Médiku espesialista kubanu sira ne’e, durante hala’o servisu iha ne’e tinan haat nia-laran, apoiu ba atendimentu Covid-19 nian iha Vera Kruz, Lahane no balun apoiu servisu iha ne’e, entaun sira-nia misaun to’o ona ohin, ita halo despedida ba sira”, Diretór Klíniku iha HNGV Marcelino Correia, dehan ba jornalista sira iha HNGV, ohin.
Tanba ne’e, HNGV hato’o agradesimentu ba médiku kubano ne’ebé durante halo kontribuisaun ba sira-nia servisu tomak ne’ebé servi ona ba povu Timor-Leste.
“Ami lori HNGV nia-naran hato’o agradesimentu ba sira tanba durante halo kontribuisuan boot ba ita-nia rai liuliu halo atendimentu ba ita-nia populasaun sira”, nia afirma.
Nia esplika, médiku kubana sira ne’e hala’o servisu iha departamentu obstretia, hemodialise, onkolojia, sirurjia, oftamolojia, forensik, medisina intensiva no pediatria.
“Iha parte balun ita presiza sira mak hanesan forensik ita sei husu apoiu ba sira no mós intensiva ita iha ona médiku maibé seidauk sufisiente, entaun ita presiza nafatin sira-nia apoiu no aumezmu tempu ita-nia emerjénsia mós presiza sira tanba ita-nia médiku sira sei ba eskola ho nune’e mak ita nafatin presiza sira-nia ajuda ka apoiu ba ita hodi halo atendimentu ba pasiente sira”, nia relata.
Tanba ne’e, HNGV sei halo fali pedidu ba sira atu apoiu tan médiku espesialista kubanu ba departamentu ne’ebé seidauk sufisiente hanesan forensic, pediatria no emerjénsi, tanba ne’e médiku husi kubanu no xineza ne’ebé sei halo atendimentu iha hamutuk 23.
Iha fatin hanesan, reprezentante Brigada Cuba iha Timor-Leste, Regelio Carcér Barbán, hateten selebrasaun aniversáriu ba dala 21 ba relasaun diplomátika, Cuba entre Republika Demokrátika Timor-Leste ne’ebé mak halo ona kolaborasaun médika iha nasaun ida ne’e.
“Ba ami-nia médiku ne’ebé ohin despedida ne’e, durante tinan haat servi ona povu no nasaun Timor-Leste iha área saúde nian”, nia konklui.
Jornalista : Felicidade Ximenes
Editór : Zezito Silva
