MTKI lansa kompetisaun inovativu iha Baucau
BAUCAU, 20 juñu 2023 (TATOLI) – Governu liuhosi Ministériu Turismu, Komérsiu no Indústria (MTKI) tersa ne’e, lansa kompetisaun negósiu inovativu zona leste iha munisípiu Baucau.
Diretór Nasionál Apoia Dezenvolvimentu Mikro Pekena no Médiu Emprezas hosi MTKI, Bernardino de Menezes, esplika, atividade ne’e nu’udar programa importante hosi MTKI hahú implementa iha tinan-2021 ne’ebé parséria ho UNDP, KOICA no IADE.
“Sira sei hetan formasaun durante loron-rua depois sei aprezenta ba pianél juri antes hakat ba faze akampamentu nune’e bele hatene joven individu no grupu ne’ebé sei asesu apoia ekipamentu,” Diretór Nasionál Apoia Dezenvolvimentu Mikro Pekena no Médiu hosi MTKI hateten iha Vila Antiga, tersa ne’e.
Programa refere implementa ba dahaat ona nune’e tinan-ne’e kontinua ho objetivu atu fó oportunidade ba juven empregadór sira atubele asesu apoia formasaun hodi kapasitasaun inklui ekipamentu hodi dezenvolve atividade negósiu ne’ebé inísia ona liuliu hasa’e rendimentu no kria kampu serbisu.
Kompetisaun negósiu refere foka ba setór sira hanesan turizmu, komérsiu, indústria no agrikultura ne’ebé aplikante sira hosi zona leste maioria iha área agrikultura no indústria.
Munisípiu haat hanesan; Manatuto, Lautém, Viqueque no Baucau aplikante dahuluk hamutuk 400-resin no pasa selesaun ba faze akampamemtu hamutuk 89 komposta hosi joven individu no grupu.
“Tuir planu rezultadu sei fó-sai iha fulan-jullu maibé agora sei iha tranzisaun governasaun entaun depende ba membru governu mai atu aselera,” Bernardino Menezes akresenta.
Totál orsamentu ba programa refere ba territóriu nasionál hamutuk rihun $900 ne’ebé fahe ba zona leste hamutuk rihun $250-resin ne’ebé bazea ba valór hosi painél hodi hetan apoia ekipamentu.
Totál joven no grupu ne’ebé hetan ona apoia ekipamentu ba negósiu liuhosi selesaun kompetisaun negósiu inovativu iha tinan-2022 hamutuk 102 ne’ebé atuál hahú kompara ona ekipamentu negósiu.
Jornalista : Natalino Belo
Editór : Evaristo Soares Martins
