Tinan 2023: MSSI apoia orsamentu millaun $1,4 ba ISS 27
DILI, 20 juñu 2023 (TATOLI)—Ministériu Solidariedade Sosiál no Inkluzaun (MSSI) fó apoia millaun $1,4 ba Instituissaun Solidariedade Sosiál (ISS) hamutuk 27 ne’ebé durante ne’e hatutan servisu MSSI nian ne’ebé hetan ona direitu ba utilidade sosiál hodi atende ba benefisiáriu sira.
Instituissaun Solidariedade Sosiál (ISS) sira-ne’ebé hetan apoiu hosi MSSI ne’e mak hanesan instituisaun sira-ne’ebé tau matan ba ema ho defisiénsia, vítima violénsia domestika no violénsia bazeia ba jéneru no vítima ba labarik feto no feto sira.
Diretór Jerál Administrasaun Finansa ne’ebé reprezenta Ministra Solidariedade Sosiál no Inkluzaun (MSSI), Rui Manuel Gago Exposto, hateten Governu fó apoiu orsamentu liuhosi ISS ho objetivu atu tulun ema sira-ne’ebé presiza fó apoiu.
“Governu fó apoiu orsamentu liuhosi ISS ho objetivu atu tulun ema sira ne’ebé presiza fó apoiu, maibé husu mós ba instituisaun sira atu ezekuta orsamentu tuir regra sira-ne’ebé eziste ona. Karik, iha mudansa ruma hosi proposta ne’ebé aprova ona, husu ba ISS atu informa ba MSSI antes ezekuta, atu nune’e ita-nia ezekusaun orsamentu bele la’o di’ak nafatin. MSSI hakarak fó apresiasaun ba servisu ISS sira-nian ne’ebé fó ona apoiu ba benefisiáriu sira hodi rezolve problema sosiál sira-ne’ebé komunidade enfrenta,” Rui Manuel Gago Exposto hateten liuihosi komunikadu ne’ebé Agência Tatoli asesu, liuhosi serimónia asina akordu koperasaun ne’ebé hala’o iha edifísiu sentrál MSSI, Caicoli, segunda (19 juñu) ne’e.
Antes ne’e, ekipa MSSI hala’o ona avaliasaun ba servisu ne’ebé sira halo no proposta ne’ebé sira submete ba ministériu liga ho sira0nia programa no atividade sira inklui sira-nia ezekusaun orsamentu.
Bazeia ba avaliasaun, nia hateten, MSSI aprova hodi realiza asina akordu ho ISS, nune’e sira bele hetan apoiu orsamentu hosi MSSI hodi finansia sira-nia atividade iha terrenu.
Tanba ne’e, nia husu ba ISS sira atu ezekuta orsamentu hirak ne’e tuir programa no atividade ho responsabilidade.
Diretór Jerál Solidariedade Sosiál no Inkluzaun, Florencio Pina Dias Gonzaga, hateten MSSI ho ISS asina akordu kooperasaun ne’e ninia imnplementasaun sira liga liu bae ma ho defisiénsia no atendimentu ba vítima sira iha uma mahon sira.
“Ohin, MSSI ho ISS hala’o asina akordu koperasaun atu bele implementa programa sira-ne’ebé ligadu ho asuntu defisiénsia ninian, protesaun labarik vulneravél sira, atividade sentru komunitária no atendimentu ba vítima sira iha uma mahon,” nia dehan.
Ba tinan ida-ne’e, alokasaun orsamentu ba ISS hamutuk millaun $1,4 ne’e liuhosi prosesu avaliasaun no diskusaun naruk ho instituisaun sira konsege ezekuta millaun $1,3 no balansu sei iha $500-resin.
Nia hateten, alokasaun orsamentu ba Istituisaun hirak ne’e ninia totál orsamentu sei lahanesan entre instituisaun ida ho instituisaun seluk, tanba depende ba sira ninia programa no atividade.
Partisipa iha Serimónia asina koperasaun ne’e mak Diretóra Jerál Sentru Nasionál Rehabilitasaun (CNR-Sigla Portugés), Representante hosi Provedoria Diretu Humanu no Justisa (PDHJ), Diretór Nasionál Promosaun no Direitu ba Ema ho Defisiénsia no Xefe Gabinete Ministra MSSI.
Jornalista : Osória Marques
Editór : Cancio Ximenes
