AMD husu negosiante Taibesi kuidadu bee-moos ne’ebé Governu oferese
DILI, 21 juñu 2023 (TATOLI)—Diretór Servisu Munisipál Jestaun Merkadu Turizmu Munisípiu Dili, Artur Henrique, husu negosiante sira-ne’ebé hala’o negósiu iha Merkadu Taibessi atu kuidadu bee-moos ne’ebé Governu oferese ba sira.
“Kona-ba mákina bomba bee iha merkadu Taibesse ne’e foin mak aat. Ita-nia BTL, E.P Timor-Leste mak monta bee ne’e, maibé ema ne’ebé uza bee ne’e mak la kuidadu. Bainhira loke bee atu uza maibé la kontrola no uza hotu husik bee suli estraga tanba la taka bee. Entaun, hosi ne’e mak mákina aat lalais de’it,” nia dehan ba Agência Tatoli, iha Matadouro, kuarta ne’e.
Nia dehan, iha merkadu Taibesi bee-moos la’ós laiha, bee ne’e iha hela maibé komunidade mak laiha konxiénsia atu oinsá uza bee-moos no kuidadu ho didi’ak.
“Ida-ne’e agora ami hatoo ona proposta ba Prezidente Autoridade Dili, no ami halo ona enkontru atu oinsá futuru no fulan oin ami haree kondisaun mákina ne’e,” nia dehan.
Maibé, tuir nia, daudaun ne’e negosiante sira konsumu hela bee ne’ebé ense iha tanke sira iha merkadu Taibesi nian.
“Agora, ami fornese bee hosi tanke mak sira asesu, no iha balun ne’ebé sosa mak hodi uza,” nia hateten.
Merkadu Taibesi nia problema boot mak negosiante toba iha merkadu no tuir loos lorokraik tenke fila ba uma toba iha uma hanesan merkadu Manleuan, hafoin kada dadeersan mak sira mai fali hala’o atividade faan no sosa.
“Ita seidauk iha kondisaun propriu atu hasai negosiante ne’ebé hela iha merkadu laran tanba iha balun ne’ebé halo uma metin nian iha merkadu. Ida-ne’e susar ba ita atu rezolve no hein katak Governu foun mai ita sei hatoo ba sira hodi bele solusiona. Ida-ne’e ami planu ona no hein atu hatoo,” nia dehan.
Jornalista : Osória Marques
Editór : Cancio Ximenes
