FRETILIN sei kontribui ba dezenvolvimentu-haforsa povu nia lian ba PN
DILI, 22 juñu 2023 (TATOLI)—Deputada Partidu FRETILIN, Nurima Ribeiro Alkatiri, hateten Fretilin sei kontribui ba dezenvolvimentu no haforsa povu nia lian ba Parlamentu Nasionál (PN).
Notísia Relevante: Aniceto Guterres dezeja Deputadu foun lejislatura daneen
“Ha’u eleitu ba membru parlamentu ne’e sai responsabilidade boot mai ha’u maibé ha’u simu.
Ha’u espera katak, ha’u sei kontribui liután ba dezenvolvimentu ba ita-nia rain ida-ne’e, hodi hasa’e lian hosi ita-nia povu ida-ne’e iha uma fukun ne’e,” Deputada Nurima Ribeiro Alkatiri hateten ba Agência Tatoli, hafoin ramata reuniaun dahuluk lejislatura daneen iha resintu PN, kinta ne’e.
Nurima hateten, nia sei hato’o difikuldade povu nian ba iha Parlamentu Nasionál hodi bele hetan solusaun di’ak ba povu no rai ida-ne’e.
“Tanba, FRETILIN nia pozisaun ne’e sempre garante estabilidade governativa no estabilidade rai-laran, atu garante katak povu no Timor-Leste sei bele ba oin,” nia dehan.
Nia subliña, diskusaun no debate hotu-hotu iha PN ne’e sei kontribui buat ne’ebé mak di’ak ba povu no rai ne’e.
“Nu’udar opozisaun la signifika atu kontra hela de’it, di’ak ka aat ita kontra, lae. Maibé, ita sei tetu saida mak ita sei aprezenta no saida mak ami sei haree objetivu ba povu no sei lori povu naroman ba povu no ami sei kontrubui nafatin. Ha’u espera katak parlamentu ne’e sei konege halo lejislasaun no prodús regulamentu sira-ne’ebé mak fó duni protesaun no fó duni benefísiu ba povu,” nia dehan.
Deputadu FRETILIN, Oscar Lima, hateten emprezáriu sei ba koa’lia kona-ba infra-estrutura sira iha Timor-Leste.
“Ha’u eleitu ba deputadu iha lejislatura daneen nian ne’e maibé ha’u nafatin sai hanesan emprezáriu ida. Kuandu sai membru Governu mak labale maibé sai membru parlamentu ne’e bele. Ha’u hili nune’e, tanba ha’u mós kontribui ona no hala’o ha’u-nia polítika kle’ur ona iha emprezáriu nian no agora ha’u iha PN. Hanesan emprezariu sei ba ko’alia kona-ba infraestrutura nian, setór privadu sira,” nia dehan.
Jornalista : Osória Marques
EDitór : Cancio Ximenes
