Grupu tolu iha Bobonaro sai benefisiáriu ba programa auto-empregu
MALIANA, 22 juñu 2023 (TATOLI) – Sekretaria Estadu Formasaun Profesionál no Empregu, selebra ona kontratu ho grupu tolu iha munisípiu Bobonaro ne’ebé sai benefisiáriu ba programa auto-empregu tinan 2023 nian.
Diretór SEFOPE munisípiu Bobonaro, Calistro Mau-Ati, esklarese foin lalais ne’e SEFOPE simu prposta 10 hosi grupu sira, maibé iha grupu hitu mak la konsege pasa, tanba bazea ba rezultadu avaliasaun iha terrenu nota katak sira-nia fatin la estratéjiku no atividade ladún la’o ho di’ak nune’e konsidera la prienxe rekizitu.
Notísia relevante: SEFOPE Bobonaro simu proposta auto-empregu hosi grupu 12
“Ninia prosesu ne’e lubuk ida, ne’ebé to’o ikus avaliasaun ne’e hosi grupu 10 ne’e tolu mak tama ba finál no hetan apoiu liuhosi programa auto-empregu tinan ne’e,” nia informa ba jornalista sira, iha Soso, Maliana, kinta ne’e.
Enkuantu grupu tolu ne’e pasa iha avaliasaun finál ida mai hosi suku Malilait, postu administrativu Bobonaro no rua seluk hosi suku Holsa, postu administrativu Maliana.
Diretór Calisto hatutan, grupu benefisiáriu ne’ebé atu hetan apoia finanseira, durante ne’e halo sira-nia atividade soru-tais, karpintária no grupu ida ho tipu atividade ofisina.
Enkuantu hosi totál benifisiáriu tolu ne’e grupu soru-tais hetan apoia orsamentu subvensaun públika hamutuk $40,480, grupu karpintária $30,642 no grupu ida ho atividade ofisina hetan montante $30,563.
Objetivu hosi prgrama auto-empregu ne’e oinsá finansia no dezenvolve sira-nia atividade, asesu ba merkadu no kria serbisu ba sira nia-aan rasik no bainhira sira-nia atividade la’o ho sesusu bele fó fali empregu ba ema seluk.
“Agora orsamentu seidauk transfere, ne’ebé ita hein hela governu foun mai mak foin apoia hodi implementa programa ne’e,” Responsável SEFOPE munisípiu Bobonaro katak.
Nia hatutan, bainhira grupu hirak-ne’e hetan ona apoia finanseira ekipa SEFOPE sei kontinua ba halo monitorizasaun iha terrenu nune’e bele haree progresu hosi atividade ne’ebé grupu sira hala’o.
Tanba ne’e diretór SEFOPE ne’e apela ba grupu benefisiáriu sira atu ezekuta orsamentu ba atividade tuir regra ne’ebé iha ona.
“Antes sira asina kontratu ne’e, iha regra balu mak kesi metin sira bainhira halo atividade, karik sira la implmenta SEFOPE iha obrigasaun atu foti fila-fali sasán sira-ne’e, sorin seluk mós ita-nia parte KAK mós sei akompaña hotu,” diretór ne’e dehan.
Notísia relevante: SEFOPE kolleta Pateka ektare ida iha Raifun
Jornalista : Sérgio da Cruz
Editór : Evaristo Soares Martins
