DILI

Komunidade konstrui uma iha área protejida Tasi-Tolu ne’e Governu mak hatene

Komunidade konstrui uma iha área protejida Tasi-Tolu ne’e Governu mak hatene

Kondisaun iha Masin Lidun, Lagoa Tasi-Tolu, segunda (19/04). Imajen TATOLI/António Gonçalves.

DILI, 23 juñu 2023 (TATOLI)–Prezidente Autoridade Munisípiu Dili (AMD), Guilhermina Filomena Saldanha Ribeiro, hateten abitante sira tenke hatene define fatin ba nia-aan rasik ba iha área protejida inklui área risku sira hodi halo uma.

Nia hateten, komunidade ne’ebé konstrui uma iha área protejida Tasi-Tolu ne’ebá ne’e Governu mak deside la’os autoridade munisípiu Dili mka deside tanba estatutu rai Tasi-Tolu ne’e Dirasaun Terras no Propriedade mak hatene.

“Agora komunidade ne’ebé mak hela iha área protejida Tasi-Tolu ne’ebá ne’e Governu mak deside la’ós munisípiu Dili. Iha estatutu rai Tasi-Tolu ne’e Terras Propriedade mak hatene. Maibé, ita hotu hatene katak Dili dezorganizadu antes ona ne’e susar atu rezolve,” nia dehan ba Agência Tatoli, iha serimónia entrega asesora Dezenvolvimentu Munisípiu Dili hosi programa PARTISIPA, iha salaun AMD, Matadouro, tersa ne’e.

Maibé nia dehan hosi kestaun sira-ne’e, komunidade mak tenke hatene fatin ida-ne’ebé mak nia bele halo uma no fatin ne’ebé mak labele halo uma, presiza hatene ida-ne’e tanba ne’e presiza komunidade mós tenke kontribui ba dezenvolvimentu liuliu área protejida ba nasaun ida-nian.

“Ida-ne’e mak dezafiu ida-ne’ebé Governu hasoru no ami-nia parte mak dehan labale halo uma iha área protejida no iha área risku sira tanba dezastre maibé kontinua halo iha fatin sira-ne’e. Ita bele dehan komunidade ne’e ita labele fera nia ulun ona,” nia dehan.

Tuir loloos lagoa Tasi-Tolu hanesan zona protejida no fatin istóriku hodi prezerva istória ba parke nasionál nian tanba fatin ne’e uluk Amu Papa João Paulo II hodi selebra misa, maibé komunidade falta konxiénsia no hahú harii uma iha área protejida sira.

Tanba tuir istória ne’ebé iha katak área protejida hanesan Tasi-Tolu-João Paulo II nia okos hateke ba Tasi-Tolu ne’e indika ona katak uluk Amu Papa João Paulo II mai iha Timor Leste iha 12 outubru 1989.

Tuir Agência Tatoli nia observasaun katak, iha área protejida Tasi-Tolu ne’e, komunidade hahú estraga ambiente sira iha ne’ebá hodi konstrui uma besik lagoa Tasi-Tolu no iha lalatek haleu Tasi-Tolu ne’e nakonu ona ho uma.

Tuir Adjuntu Prezidente Autoridade Munisípiu Dili, António Moniz Calau, hateten intervensaun ba sira katak to’o loron ida estudu no Governu halo dezenvolvimentu karik ita-boot sira tenke kumpre no sei la ezije buat ida ba Estadu

“Ita autoridade munisípiu Dili sempre halo intervensaun no avizu katak labele halo uma iha fatin protejida sira no hanesan horibainrua ami halo intervensaun kedas ba komunidade ka família ida mak halo uma mota Comoro nian, maibé ekipa hateten no sobu tiha uma ne’e. Ami sempre halo no área protejida ne’e mós ekipa kontinua kontrolu,” nia dehan.

Nia hateten, komunidade ne’ebé hela iha área protejida ne’e ekipa munisípiu Dili orienta ona katak tempu badak tenke sobu maibé kuandu la sobu ekipa mak sei sobu.

“Ita fó tempu ba sira ona liuliu área Tasi-Tolu nian maibé kuandu la sobu mak ha’u haruka ekipa tun ba sobu uma, se ita husik halo uma mak seluk sei halo tuir tan. Ne’ebé sira la book mak ami sobu,” nia hateten.

Kona-ba João Paulo (JP) nia ain hateke ba tasi ne’e, nia dehan autoridade Dili seidauk identifika ema halo uma iha ne’ebá maibé depois haruka ekipa observa took fatin ne’e.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!