BALIBO, 27 juñu 2023 (TATOLI) – Ministériu Agrikultura no Peska (MAP), tersa ne’e apoia fasilidade teknolojia post-kolleta ba grupu alvu sub-basia idrografia Loes hamutuk 19 hodi dezenvolve projetu Hasa’e Produtividade Agrikultura Sustentável (HAPAS) iha suku Balibo Vila, postu administrativu Balibo, munisípiu Bobonaro.
Apoia hirak-ne’e entrega ba grupu benefisiáriu sira mak hanesan; mákina multifunsaun unidade 26, dasing tara 26, silo 570, mákina tetu karau dijitál 12 no lona 149. Enkuantu fasilidade hirak- ne’e sosa ho montante orsamentu hamutuk rihun $48,364.
Reprezentante Prezidente Komité Jestaun sub-basia Idrografia Loes projetu HAPAS atuál Sekretáriu Autoridade Munisípiu Bobonaro, João de Fátima do Carmo, espera ho apoia hirak-ne’e grupu sira bele hasa’ae produsaun rai-laran hodi nune’e bele hetan rendimentu ekonomia lokál no kombate problema má-nutrisaun.
Notísia relevante: MAP apoia orsamentu $47,811 ba grupu 10 iha Ritabou implementa projetu HAPAS
“Ha’u fiar katak mákina sira ne’e ita-boot sira bele uza hodi halo prosesamentu ba iha fore-mungu no batar, ita-boot sira mós bele halo kombinasaun ai-haan sira-ne’ebé nutritivu atubele fó haan ba ita-nia oan sira, tanba dadus hatudu ita iha munisípiu Bobonaro má-nutrisaun sei rejista aas,” nia hateten iha intervensaun.
Diretór Servisu Agrikultura Munisípiu Bobonaro, Miguel Gomes Lopes, reforsa apoia ne’e hanesan komponente datoluk hosi projetu HAPAS hodi tulun no fasilita grupu benefisiáriu halo jestaun armazeinamentu ba funu no atu prosesa rasik sira-nia produtu hodi bele distribui ba merkadu ho rezultadu ne’ebé di’ak no kualidade.
“Ita konsumu karik bele di’ak ba ita-nia saúde, karik ita transporta ba merkadu karik, ema sosa na’in sira-ne’e la dúvida ninia kualidade,” Diretór ne’e katak.
Reprezentante Diretór SAPIP, Paulino Mendonça, apela ba grupu sira atu utiliza fasilidade hirak- ne’e ho onestidade no responsabilidade atu nune’e projetu refere bele iha ninia sustentabilidade.
“Iha grupu ne’e ita tenke servisu nakloke ba malu, la’ós tau iha xefe grupu nia bee nia mak sai na’in lae ida, imi tenke kolabora malu atu nune’e fó benefísia ba iha ita-boot sira-nia atividade, atu ita-boot sira uza ba future,” nia dehan.
Administradór postu administrativu Balibo, Amilcar Tavares, sente kontente no agradese tanba projetu ne’e bele fó ona serbisu ba komunidade sira, nune’e nia apela ba líder lokál sira liuliu xefe aldeia atu halo monitorizasaun ba fasilidade ne’ebé grupu sira utiliza.
“Tanba ne’e la halimar ho osan estadu, estadu nia estadu nian, atu fó ba hasa’e ita-boot nia pendapantan ekonomia uma-laran. Sé ita-boot sosa sasán mak laloos, ohin kedas ha’u halo karta hasai tiha, ema barak mak atu tama,” nia hateten.
Enkuantu totál benefisiáriu direita ba projetu ne’e iha Balibo Vila hamutuk 570 no indireita na’in-2,489 komposta hosi mane 1,219 no feto 1,270.
Projetu ne’e atu hadi’a produtividade hosi agrikultór ki’ik sira no fó-tulun atu fa’an produtu sira-ne’e, liuhosi planu dezenvolvimentu ida-ne’ebé atu ezekuta iha zona mota Raumoko nian iha Lautem, zona mota Belulik nian entre Ainaro no Covalima.
Nune’e mós zona mota Loes nian entre Liquiçá, Ermera no Bobonaro, no basia idrográfika Tono nian iha RAEOA.
Projetu ne’e hetan finansiamentu hosi programa seguransa ai-haan no agrikultura globál, (GAFSP, sigla inglés), ho montante millaun $21, ne’ebé hala’o liuhosi parseria Banku Mundiál, Organizasaun Sosiedade Sivíl sira no Organizasaun Nasaun Unida nian ba Ai-han no Agrikultura (FAO, sigla inglés).
Notísia relevante: MAP halo avaliasaun HAPAS ba munisípiu neen
Jornalista : Sérgio da Cruz
Editór : Evaristo Soares Martins
