Governu presiza define loron kooperativa ba agrikultór TL
DILI, 28 juñu 2023 (TATOLI)—Prezidente Movimentu Kamponeza Timor-Leste (MOKATIL) Nasionál, Hélio Dias da Silva, hateten Governu presiza define loron kooperativa ba agrikultór Timor-Leste (TL).
Notísia Relevante: MOKATIL husu Governu kria lei própriu ba kooperativa
“Governu tenke hanoin ona hodi kria loron kooperativa rasik, ita presiza define ona loron hodi dignifika ita-nia fundadór Estadu hanesan Nicolau Lobato no Vicente Reis “Sahe” ne’ebé mak iha inisia ka sai hanesan inisiadór hodi funda kooperativa tinan 1975 iha área Bucoli-Baucau no Bazartete munisípiu Liquiça nian, entaun hosi ne’e Governu tenke define ona loron ida hodi selebra no dignifika mós ita-nia eroi sira-ne’e,” nia dehan ba Agência Tatoli, iha nia kna’ar fatin Mandarin, Dili, kuarta ne’e.
Nia dehan, Timor-Leste selebra de’it loron mundiál kooperativa maibé tinan 21 independénsia seidauk bele define no deside mesak nia loron kooperativa ba nia agrikultór sira.
“Realidade ne’e mak ita-nia maluk CPD-RDTL ho grupu balun halo servisu komunál ka hamutuk. Konseitu sira-ne’e sira halo tanba hakarak kontinua eroi sira-nia luta no esforsu ba kooperativa iha momentu ne’ebá,” nia dehan.
Nia hateten, agora tempu ona Governu deside no define loron ba kooperativa hodi akumula agrikultór sira-ne’ebé iha toos laran no natar sira.
“Kuandu ita iha loron kooperativa mak ita sei selebra hamutuk ho ita-nia toos-na’in no natar-na’in sira. Ita selebra tinan dala ida maibé sira loron-loron iha toos no natar laran,” nia hateten.
Prezidente MOKATIL ne’e hateten, Saudozu Nicolau Lobato ho Saudozu Vicente Reis “Sahe” sira mak sai pioñeiru ba independénsia maibé sira mós pioneiru ba kooperativa nian tanba sira na’in-rua (2) mak hahú hari’i kooperativa iha Timór, hosi espíritu solidariedade no espíritu kooperativa hodi hetan independénsia, tanba ne’e presiza duni Governu tau atensaun.
Jornalista : Osória Marques
Editór : Cancio Ximenes
