BNCTL apoiu rihun $1 ba AHDMTL selebra aniversáriu ba dala-12
DILI, 30 junu 2023 (TATOLI)—Diretór Interinu Asosiasaun Halibur Defisiénsia Matan Timor-Leste (AHDMTL), Gabriel Ponciano, hateten Banku Nasionál Komérsiu Timor-Leste (BNCTL, sigla portugés) fó apoia orsamentu $1.000 atu selebra aniversáriu AHDMTL ba dala-12 ne’ebé sei selebra iha 01 jullu.
“Durante atividade loron rua ba aniversáriu AHDMTL nia ba dala-12, ami hetan apoiu hosi parseiru hanesan Timor Telekom, Telkomcel, Visi Mitra, no Burger King, World Vission. Maibé BNCTL mak apoiu osan $1.000 no sira seluk apoiu ekipamentu, no World Vission parte komsumsi nian ba ami,” nia dehan ba jornalista sira, iha AHDMTL, Manleuana, sesta ne’e.
Ponciano hatutan, iha aniversáriu ba dala-12 ne’e foti tema “Dezafiu mak Opurtunidade Hamutuk Haforsa AHDMTL ba Loron Aban, Ohin no Ba Futuru”.
“Ita foti tema ne’e dala ruma ami ema ho defisiénsia (EhD) susar no menus ba finanseiru, entaun sai dezafiu boot ba ami. Dezafiu seluk mak ita-nia maluk defisiénsia maiória iha rurál la asesu ba informasaun. Maibé, ba ami defisiénsia la sente dezafiu ne’e sai barreira ba ami, ami nafatin iha esperitu no vontade voluntarizmu iha sosiedade no rai ida-ne’e hodi luta ba direitu ema ho defisiénsia nian,” nia hateten.
Atividade loron dahuluk mak AHDMTL realiza kompetisaun mobilidade, letra braille nian ba ema ho defisiénsia sira no aban festeza aniversáriu AHDMTL nian.
“Atividade ne’e atu halo ema ho defisiénsia sai ativu, kreativu no inovativu hodi kontribui ba dezenvolvimentu rai-laran,” nia dehan.
Reprezentante ema ho defisiénsia matan, Januário Pinto, husu IX Governu atu konsidera mós ema ho kondisaun defisiénsia.
“Iha aniversáriu AHDMTL ba dala-12 ne’e, husu atu kria fatin ka kondisaun ne’ebé asesivél ba ema ho defisiénsia tanba durante ne’e Governu ladún tau atensaun ba ami. Tanba ne’e, sujere Governu foun tenke tau mós prioridade ba asuntu ema defisiénsia sira,” nia dehan.
Dadus ema ho defisiénsia iha Timor-Leste, hahú hosi 2015 mai to’o 2023 ne’ e ho totál ema hamutuk 4.828.
Jornalista : Osória Marques
EDitór : Cancio Ximenes
