Prosesu aprendizajen iha EBF Paiól ladún efetivu tanba falta manorin
DILI, 30 juñu 2023 (TATOLI) – Profesór na’in-neen iha Eskola Bázika (EBF) Filiál Paiól, iha suku Lahane Osidentál, labele ona kontinua hanorin alunu 500, tanba sira-nian kodisaun lapermite atu halo prosesu aprendizajen iha aula.
“Ha’u hakarak dehan katak prosesu ensinu iha EBF Paiól la’o hela, maibé la efetivu hanesan baibain ona, tanba ita hasoru hela problema ho profesór kuaze na’in-neen maka tama ona idade reforma no sira-nian prezensa menus ona iatu hanorin estudante sira”, koordenadór eskola,Tomas da Costa, hatete ba Tatoli, iha Lahane Osidentál.
Nia dehan manorin sira ne’ebé tama ona idade reforma ne’e kuaze profesór da turma de’it no sira-nian prezensa iha eskola menus ona no dalabarak mai tarde. Nia akresenta sira la aguenta atu hamriik kle’ur hodi hanorin estudante sira.
Haree ba kestaun ne’e maka koordenadór eskola rekomenda ba Governu foun, liuhusi Ministériu Edukasaun atu toma responsabilidade ba asuntu hodi rezolve uluk problema profesór idade reforma sira, nune’e labele difikulta prosesu aprendizajen.
“Hanesan manorin lakohi atu sakrifika estudante sira, tanba de’it ami-nian problema. Bainhira eskola enfrenta dezafiu sira ne’e, ami iha obrigasaun informa ba superiór sira katak ami-nian estudante sira la simu ona dixiplina ho efetivu tanba problema saúde manorin sira-nian”, realsa.
Tanba ne’e, nia sujere ministériu tenke substitui fali profesór foun ba eskola ne’e hodi fó tempu ba manorin na’in-neen atubele deskansa.
Eskola EBF Paiól rejista manorin hamutuk na’in-17, maibé antes ne’e iha profesór ida maka labele hanorin tanba moras. Nune’e, hela de’it 16 mak sei ativu, más agora iha tan na’in-neen maka ho kondisaun moras tanba fator idade. Entaun, eskola iha de’it manorin na’in-10 maka kontinua ativu hela.
Diretór-Jerál Administrasaun no Finansa husi MEJD, Antoninho Pires, afirma ministériu tau ona iha konsiderasaun, maibé sei haree uluk mapa pessoal, nune’e bele halo mobilizasaun profesór permanente sira ba prienxe fali fatin ka eskola sira ne’ebé maka menus profesór tanba kestaun ho reforma, mate no seluk tan.
EBF Paiól presiza moru atu asegura ambiente eskola husi lixu
Aleinde kestaun prosesu aprendizajen ne’ebé ladun efetivu, EBF Paiól mós presiza muru protesaun atu asegura ambiente eskola husi komunidade ne’ebé hela besik, tanba so’e lixu arbiru iha resintu eskola nian.
“Ha’u bele dehan eskola ne’e harii kedan iha komunidade nia leet no ema tama sai. Laiha muru atu proteje ambiente eskola, entaun kuandu iha tempu kalan komunidade sira hemu tua lanu, balun so’e fo’er arbiru de’it iha resintu eskola ne’e. Ami-nian estudante sira maka tenke hamoos hela de’it”, diretór eskola, Tomas da Costa, relata.
Hanesan dirijente másimu iha eskola ne’e la kontente ho situasaun ne’ebé iha no nia salienta katak loloos ne’e alunu sira atu tuir aula, la’ós atu hamoos fali ema-nia fo’er sira ne’ebé mak naklekar hela iha eskola ne’e. “Ha’u haree loron-loron estudante sira mak sai vítima ba hahalok laiha morál ne’ebé husik hela iha resintu eskola ne’e, ha’u sente triste loos”, katak.
Hanesan dirijente, nia husu ona apoiu ba autoridade suku iha bairru Paiól ne’e atu hamutuk kontribui ba seguransa eskola, liuhusi divulgasaun informasaun ba komunidade sira hela besik eskola ne’e atu kuidadu ambiente, maibé laiha mudansa.
Tanba ne’e, parte eskola husu ajuda ba Servisu Edukasaun Munisípiu Dili atu halo netik planu ruma iha governasaun foun ne’e hodi hadi’a tiha moru iha eskola Paiól ne’e atu bele haketak tiha eskola husi komunidade sira hodi lori filafali ambiente ida saudavel ba alunu sira.
Nia dehan ho maneira ida ne’e maka sei proteje estudante sira, tanba bainhira atu partisipa iha aprendizajen ida di’ak, kondisaun eskola tenke moos, livre husi buat hotu ne’ebé la di’ak.
Ba kestaun ne’e, Diretór Servisu Edukasaun Munisípiu Dili, Carlito da Silva, responde katak tinan ida ne’e iha planu atu kontinua konstrusaun muru ba eskola sira no eskola Paiol mós tama ona iha planu sira ne’e, maibé eskola maka besik liu komunidade sira-nia hela fatin.
Nune’e ministériu presiza estuda bainhira halo muru karik labele mosu dezentendimentu entre eskola ho komunidade sira, tanba eskola Paiól ninia espasu laiha ona. “Maibé, ita sei buka solusaun ruma karik labele hadi’a moru, ita bele iha alternativu seluk atu proteje estudante husi komunidade sira”, konklui.
Jornalista: Tomé Amado
Editora: Maria Auxiliadora
