Miguel Pereira: Ministru foun kontinua misaun balun ne’ebé MAE seidauk konklui
DILI, 05 jullu 2023 (TATOLI)—Ministru Administrasaun Estatál (MAE) sesante, Miguel Pereira de Carvalho, hateten ministru foun bele haforsa no kontinua hala’o misaun lima ne’ebé mak MAE durante ne’e implementa no balun seidauk konklui iha mandatu 2018-2023 ne’e.
Notísia Relevante: Tomas Cabral: “Loron 120 nia laran poder lokál tenke funsiona”
Nia espera, ministru foun ba Estatál nian mak buat foun ne’ebé sira halo ona tenke halo kontinuidade no ba sira-ne’ebé mak seidauk di’ak, presiza hadi’ak liután, nune’e bele sai di’ak liután.
“Prioridade atu reforsa no kontinua mak desentralizasaun no poder lokál, dezenvolvimentu lokál, ijiene organizasaun públika no organizasaun urbana, apoiu suku no eleisaun refrendariu inklui prezervasaun dokumentu estadu nian kona-ba lei munsipál balun aprova ona. Espera katak governasaun foun mai realiza eleisaun sira, iha área dezenvolvimentu lokál, PNDS inklui Uma Naroman ba Povu, presiza haree no konklui nia ezekusaun,” Ministru Miguel hateten ba Agência Tatolil, hafoin hala’o serimónia Hand Over servisu, iha MAE Colmera, segunda ne’e.
Tanba ne’e, nia hateten, nia parte iha disponilidade bainhira presiza atu kompleta buat ruma ne’ebé seidauk kompletu, ka ohin loron nia seidauk esplika hotu ka relata hotu iha relatóriu ne’ebé entrega ona ba ministru foun.
Maibé, iha VIII Governu Konstitusionál nia mandatu ne’e, MAE halo lei tolu hodi estabelese poder lokál ne’ebé hetan aprovadu iha Parlamentu Nasionál no promulga hosi Prezidente Repúblika mak Lei poder lokál Administrasaun Administrativa, Lei Eleisaun munisipál no Lei Finansa Munisipál.
Iha tinan ikus, projetu 1.800 kona-ba infraestrutura rurál ne’ebé suku sira mak halo, tanba suku ida iha osan kuaze $450.000, no hosi osan ne’e mak halo eskola rurál ne’e de’it hamutuk rihun $200 no aumenta tan Uma Naronam ba Povu ho osan $200.000 no PNDS regulár rihun $50.
“Entaun, hosi ne’e ha’u bele dehan iha evulusaun boot iha nível dezenvolvimentu. Maibé, hosi programa ne’ebé VIII Governu iha ba MAE ne’e, iha balun ne’ebé seidauk finaliza maibé ida- ne’e, ha’u labele rekomenda ba Governu foun tanba Governu ida-idak mai ho nia programa. Maibé, ha’u hanoin governasaun ne’ebé di’ak mak sempre rona nia populasaun nia hakarak no fiar katak populasaun barak mak iha baze. Tanba, buat ne’ebé ha’u ko’alia ne’e di’ak ba povu, tanba ne’e ha’u hanoin presiza kontinua tanba povu mak sai benefísiu direta,” nia hateten.
Jornalista : Osória Marques
Editór : Cancio Ximenes
