EDUKASAUN

KomSos-UNTL ajuda igreja no halo sosializasaun ba Estudante iha Liquiça

KomSos-UNTL ajuda igreja no halo sosializasaun ba Estudante iha Liquiça

Estudante DCS iha Liquiça. Imajen/ Pedro A. da C. Ximenes, Emestio Olavio da Costa & Octaviana Ivia da C.G. Correia

DILI, 06 jullu 2023 (TATOLI) – Estudante Komunikasaun Sosiál (KomSos), Universidade Nasionál Timor Lorosa’e (UNTL) ho inisiativa ajuda igreja liuhusi atividade hada moru hale’u resintu igreja nian, iha munisípiu Liquiça.

Atividade ne’e nu’udar atividade ida husi atividade rua seluk hanesan Hametin amizade entre estudante, dosente ho komunidade.

No, sosializasaun ba estudante Eskola Sekundáriu Públika Nú 1 Liquiça no Eskola Sekundária Katólika, São João de Brito, Liquiça kona-ba Vizaun no Misaun (Perfíl) Departamentu Komunikasaun Sosiál, UNTL, iha ámbitu ‘bina-akrab’, ne’ebé hala’o durante loron tolu, hahú husi 22 to’o 25 juñu 2023.

“Atividade ne’e kada tinan departamentu hala’o, estudante ho Asosiasaun Estudante Departamentu nian (AED) mak organiza. Sira mak halibur osan, kria komisaun, planu atividade aprezenta ba departamentu hodi haree no aprova mak implementa. Tanba ne’e, la halo de’it bina-akrab maibé halo mós atividade servisu sosiál no sosializasaun”, Diretór Marcelino hateten, tuir komunikadu Media UNTL ba Tatoli.

Atividade akadémika ne’e refleta tuir trilojia universidade nian katak Estuda, Peskiza no Dedikasaun ba Komunidade.

Profesór Marcelino hatutan, atividade ne’ebé estudante KomSos – departamentu ida pertense ba Fakuldade Siénsia Sosiál (FCS, sigla portugés), UNTL,  hala’o ho objetivu atu presta mós prezensa departamentu, fakuldade no universidade nian iha komunidade no motiva foinsa’e sira iha lokál.

Iha fatin hanesan, Amu Pároku São João de Brito, Likisá, Pe. Natalino V.D.S Gama, agradese ba apoiu ne’ebé estudante sira hala’o, tanba la’ós aprende de’it siénsia maibé aprende mós ho karakter.

“Inísiu sira aprosima amu hodi aprezenta sira-nia atividade, nune’e hanesan amu pároku aseita no apoia atividade ne’ebé hala’o iha ne’e. Agradese UNTL-FCS nia DCS bele organiza atividade ne’ebé di’ak tebes, hakbesik mai komunidade, igreja no eskola sira, buat hirak ne’e hotu bele muda estudante sira-nia formasaun karakter”, Amu Natalino apresia.

Relasiona ho atividade ne’e, Sandra Otaria estudante turnu 2023 nian sente orgullu tanba sai hanesan lisaun atu hakbesik ba komunidade, hatene organiza no hala’o knaar hanesan estudante bele amizade liután.

“Atividade ne’ebé hala’o hanorin ami atu halo servisu ba komunidade, aprende oinsá organiza, respeita regra sira, kria amizade entre estudante, dosente no komunidade, nune’e bele hakbesik universidade liuliu DCS besik ba komunidade”, Sandra dehan.

Entretantu, atividade ne’ebé hala’o loron tolu ne’e akompaña husi dosente DCS nian. Nune’e mós, Komisaun ba eventu nian oferese simentu hamutuk saka sanulu (10) ba Igreja Parókia São João de Brito, Liquiça, hodi konstrui morru igreja nian, partisipa iha misa, inklui halo limpeza iha área igreja nian.

Estudante sira kompostu husi estudante I semestre to’o finalista sira hamutuk 258, no akompaña husi dosente sira, Amu-Pároku Pe. Natalino V.D.S Gama ho Diakonu.

Tatoli

 

iklan
iklan

Leave a Reply

iklan
error: Content is protected !!