Lubis sei lori voluntáriu hosi Indonézia kontribui iha setór enérjia renovavél
DILI, 06 jullu 2023 (TATOLI)—Eis Embaixadór Indonézia ba Noruega, Todung Mulya Lubis, hateten nia sei kontinua fó apoiu ba kandidatura Nahdlatul Ulama (NU) no Muhammadiyah, no sei lori voluntáriu balun hosi Indonézia hodi kontribui iha setór enerjia renovavel iha Timor-Leste.
“Ita hakarak kontribui ba dezenvolvimentu enerjia renovavel iha Timor-Leste no ita sei fila-fali ba oportunidade sira-ne’ebé ita bele hetan. Ita hakarak kontribui duni tanba ita mós hakarak Timor-Leste atu la’o ba oin hanesan nasaun sira seluk iha rejiaun ne’e,” eis Embaixadór Indonézia ba Noruega, Todung Mulya Lubis, hateten ba jornalista sira hafoin sorumutu ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Enérjia renovavél hanesan tranzisaun enerjia hosi enérjia bazeia ba fosil, hanesan mina-rai ba enérjia renovavél, tanba Timor-Leste iha potensialidade boot hanesan ezemplu iha área Hidropower no mós solár no WIN.
“Oportunidade ida-ne’e iha potensialidade boot iha Timor-Leste no ita haree katak teknólojia ne’e disponivél ona no ita mós iha esperiénsia, nune’e ita bele hetan oportunidade atu servisu hamutuk ho kompañia sira iha Timor-Leste,” nia dehan.
Xefe Estadu mós fó apoiu makaas ba kontribuisaun ne’e tanba bele fornese bee-moos iha uma no eskritóriu ida-idak iha sidade Dili ho populasaun besik 300,000, ne’ebé bele hadi’a kualidade moris ema-nian.
Nune’e, ohin ho nia ekipa iha kinta-feira hala’o sorumutu ho Prezidente Repúblika, José Ramos Horta, hodi haklaken formasaun IX Governu Konstitusionál foin nomea hosi Prezidente Repúblika.
“Ami kontente tebes atu fila-fali ba Timor-Leste hodi hasoru malu ho Prezidente Ramos Horta, belun di’ak ida-ne’ebé ha’u hatene ba tempu kle’ur ona. Ami kongratula ita-boot sira-nia formasaun ba Governu foun Timor-Leste nian, ne’ebé foin lalais ne’e instaladu. Ami na’in-rua mós hato’o ami-nia parabéns ba Timor-Leste nu’udar parte hosi família boot ASEAN nian no ida-ne’e loke odamatan barak liután ba Indonézia no Timor-Leste atu servisu hamutuk hodi harii Timor-Leste no mós ba konstrutór sira iha Indonézia. Ha’u hato’o mós ba Prezidente Ramos Horta no agradese ba Prezidente Ramos Horta nu’udar laiureadu Premiu Nobel ba Paz ne’ebé fó apoiu ba Nahdlatul Ulama no Muhammadiyah nia nomeasaun ba Prémiu Nobel ba Paz,” nia dehan.
Jornalista : Osória Marques
Editór : Cancio Ximenes
