DESPORTU, DILI

Karketu Dili FC seidauk simu subsídiu 60% hosi FFTL-LFTL

Karketu Dili FC seidauk simu subsídiu 60% hosi FFTL-LFTL

Sekretáriu Jerál klube Karketu Dili FC, Elizeu Isaac. Imajen Tatoli/Hortencio Sanchez.

DILI, 10 jullu 2023 (TATOLI) – Sekretáriu Jerál Klube Karketu Dili FC, Elizeu Isaac, husu ba Federasaun Futeból Timor-Leste (FFTL) no Liga Futeból Timor-Leste (LFTL) atu aselera pagamentu 60% hosi orsamentu subsídiu klube liga époka 2022-2023.

“Jogu la’o no remata ona, ami mak hanesan ekipa kampiaun iha primeira divizaun nian, to’o ohin loron, relatóriu ami hatama ona maibé FFTL no LFTL seidauk halo pagamentu mai ami, antes ne’e halo ona pagamentu 40% ba ami-nia preparasaun jogu to’o jogu remata ona, ami-nia osan 60% ne’e seidauk halo pagamentu ne’e tanba saida”, Elizeu dehan ba Agência TATOLI, iha Palásiu Governu Dili, segunda ne’e.

Nia dehan, tuir informasaun ne’ebé iha, maioria klube FFTL no LFTL halo ona pagamentu maibé Karketu no DIT mak to’o ohin loron seidauk hetan direitu subsídiu jogu ho kompletu.

“Durante ne’e ami klube vítima, maibé agora sai ona kampiaun maibé vítima nafatin, klube balun osan tama ona maibé ami seidauk tama ne’e oinsa, la sala, ami ho DIT FC mak osan seidauk tama, osan ba subsídiu ne’e hamutuk rihun $20 maibé hosi osan ne’e ami foin mak simu 40%, hela 60%, ami husu ba FFTL no LFTL tenke haree mai ami nia kestaun ne'”, Elizeu dehan.

Nia hatutan, orsamentu ne’ebé FFTL no LFTL seidauk halo pagamentu difikulta klube atu selu jogadór no dívida hirak ne’ebé durante ne’e klube iha.

“Ha’u rasik submete ona relatóriu besik fulan rua ona, maibé osan seidauk tama bebeik ne’e oinsa, tuir prosesu normál ne’e relatóriu tama ona tarde liu semana rua osan tama ona ami-nia konta maibé agora laiha”, nia relata.

Ho asuntu ne’e, Tatoli tenta atu konfirma ho parte FFTL no LFTL maibé okupadu hela ho servisu esensiál balun no seidauk fó komentaáriu.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!