Deputadu CNRT husu MI koloka seguransa sivíl iha Kristu Rei
DILI, 11 jullu 2023 (TATOLI)—Deputadu hosi bankada CNRT, Marcos Xavier, husu ba Ministéiru Interiór (MI) atu koloka pesoal seguransa sívil iha fatin turizmu Kristu Rei iha Fatucama.
“Ba Ministéiru Interiór liuhosi Protesaun Sivíl, ha’u haree fatin ne’ebé mak uluk destaka seguransa sivíl sira, maibé agora seguransa sivíl sira-ne’e dada hotu tiha. Ezemplu, hanesan iha área branka Kristu Rei, fatin ne’ebé mak uluk destaka seguransa sivíl iha ne’eba, nune’e atu kontrola movimentu komunidade ba iha fatin refere, maibé dada tiha,” nia hateten liuhosi reuniaun plenária PN, tersa ne’e.
Nia hateten, tanba laiha seguransa sivíl mak rezulta lixu barak ne’ebé soe arbiru de’it, ne’eduni husu ba ministéiru tutela atu tau atensaun ba iha fatin turizmu sira-ne’e, tanba turista internasionál no domestíka sempre ba vizita fatin hirak ne’e.
“Iha Dili ne’e iha fatin rua, ida estátua Kristu Rei iha Fatucama no João Paulo II iha Tasi-Tolu, maibé agora seguransa sívil laiha ne’eba, ne’eduni husu funsiona fali,” nia dehan.
Nia levanta mós kona-ba sintina públiku iha área Kristu Rei ne’ebé iha ne’eba la funsiona tanba bee-moos laiha no laiha manutensaun.
Deputadu hosi bankada Partidu Demokrátiku (PD), Alexandrino Nunes, sujere iha fatin balun importante tebes atu estabelese ka monta tan sumáfru iha Dili laran liuliu hanesan iha ponte Kuluhun, tanba tuir observasaun ne’ebé iha sempre mosu engarafamentu.
Nia mós foti kestaun kona-ba terminal tanba daudaun ne’e Timor-Leste halo akordu ho Indonézia katak bus DAMRI mós movimentu tama Timor-Leste maibé kondisaun terminál Tasi-Tolu sai preokupasaun, ne’ebé presiza haree dezenvolve terminál sai internasionál.
Jornalista : Nelson de Sousa
Editór : Cancio Ximenes
