FC Fini sei reprezenta RAEOA partisipa eventu nível rejionál iha Ermera
OÉ-CUSSE, 11 jullu 2023 (TATOLI) – Vise-Prezidente Asosiasaun Futeból Oé-Cusse (AFO) iha Rejiaun Administrativa Espesiál Oé-Cusse Ambeno (RAEOA), Julio Coel, informa, klube FC Fini mak sei reprezenta Oé-Cusse hodi partisipa eventu nível rejional ba eventu Telkomcel-cup iha munisípiu Ermera.
Notísia relevante: FC Fini kampiaun Telkomcel-Cup époka 2023 iha Oé-Cusse
“Ekipa hosi FC Fini, maka sei reprezenta AFO sei ba jogu iha nível rejionál iha munisípiu Ermera,” Julio Coel, ko’alia iha enseramentu eventu Telkomcel-Cup iha kampu futeból Oébau, segunda ne’e.
Nia informa, hirak-ne’ebé sei partisipa jogu iha munisípiu Ermera, hosi asosiasaun futeból Oé-Cusse, Likisa, Dili Oste no asosiasaun futeból Ermera, klubu rua kada rejiaun mak reprezenta ba partisipa iha jovu nível nasionál iha Dili.
“Sei jogu iha nível rejionál, orsida klubu rua mak sei reprezenta nível rejionál, tanba eventu fahe nível rejionál; haat, Ermera, Bobonaro, Baukau no ida iha Ainaro,” nia afirma.
Nia hateten, orsamentu ne’ebé sei uza iha eventu nível rejionál ne’e, FFTL koloka ona osan hamutuk $2,500,00, hodi uza ba transporte akomodasaun inklui konsumu.
“Planu atu dezloka ba Ermera, seidauk iha kalendariu fiksa, tanba iha munisípiu balu sei kontinua jogu iha nível munisipál, bainhira remata ita sei rona orientasaun hosi nasionál mak hafoin ita dezloka ba,” nia apela.
Treinadór FC Fini, Fernando Mala, promete sei lidera ekipa halo perparasaun másimu hodi hatudu jogu di’ak iha eventu nível rejionál iha munisípiu Ermera.
“Ami sei prepara másimu atu partisipa iha jogu nivél rejionál, tanba ohin ami simu ona informasaun hosi AFO, katak ami mak sei reprezenta, tan ne’e ami tenke hadi’a no prepara di’ak ami-nia ekipa atu hatudu jogu di’ak iha jogu nível rejionál,” nia katak.
Notisia relevante: FC Fini kampiaun Telkomcel-Cup époka 2023 iha Oé-Cusse
Jornalista: Abílio Elo Nini
Editor: Evaristo Soares Martins
