FC Fini kampiaun Telkomcel-Cup époka 2023 iha Oé-Cusse
OÉ-CUSSE, 11 jullu 2023 (TATOLI) – Ekipa futeból sub-17 hosi klube FC Fini hosi sub-rejiaun Nítibe sai kampiaun iha eventu Telkomcel-Cup époka 2023 iha Rejiaun Administrativa Espesiál Oé-Cusse Ambeno (RAEOA) hafoin halakon ekipa FC Villanos iha faze finál ho rezultadu 5-2.
Notísia relevante: AFO rejista klube futeból neen kompete eventu Telekomsel iha Oé-Cusse
Ekipa rua ne’e realiza jogu finál ne’e iha kampu futeból Oébau, sub-rejiaun Pante Makasar, iha segunda lokraik ne’e, kada klubu mai ho sira-nia adeptu kuaze rihun ba rihun mak partisipa, hodi fó apoia ba ekipa idak-idak nia klubu, tanba nu’udar jogu ikus atu hadau kampeonatu ba taxa Telkomcel-Cup époka 2023 tinan ne’e.
Jogu finál ne’e hahú ho primeira parte menutu 45, ekipa rua lansa kedas kontra-atake ba malu tuir idak-idak nia tékniku no tátika jogu hodi hetan vitória iha eventu ne’e.
Maibé ekipa FC Fini sorti di’akliu tanba jogu foin la’o to’o de’it menutu 16, jagadór José da Cunha ho númeru kamizola 6 lansa uluk golu ida hodi hatuur rezultadu 1-0.
Vitória dahuluk ne’e halo ekipa FC Fini aumenta vontade ho unidade metin liután, tanba jogu foin liu menutu tolu de’it, iha menutu 19 jogadór Natalino Lalisuk ho númeru kamizola 19 lansa-tán golu daruak hodi muda rezultadu sa’e ba 2-0.
Ho vitória daruak ne’e, halo ekipa FC Villanos hahú lansa estratéjia foun iha menutu 31 hodi troka jogadór sira, liuhosi jogadór Leandro Monteiro númeru kamizola 16 hodi troka jogadór Elgar Taimenas númeru kamizola 4.
Ho estratéjia foun ne’e konsege lansa ameasa ba rede FC Fini liuhosi jogadór Jario Beno númeru kamizola 18, maibé lakonsege prodús golu ruma tanba guarda rede FC Fini konsege salva tiha.
Nune’e ekipa FC Fini hahú ho jogu tátika foun hodi pasa bola ho kalma halo ekipa FC Villanos tensaun to’o ikus akontese tebe livre (penalidade) iha menutu 34, tanba defeza FC Villanos númeru kamizola 11 kontra regra hatudu jogu brutal iha liña oin.
Nune’e árbitru fó oportunidade ba ekipa FC Fini liuhosi jogadór Natalino Lalisuk númeru kamizola 19 ezekuta tiru livre, hodi muda rezultadu sa’e tán ba 3-0, nune’e jogu iha primeira parte la’o to’o termina ho menutu 45, ekipa FC Fini provizóriamente lidera ho rezultadu 3-0.
Hafoin intervallu durante menutu 15, jogu kontinua hikas ba segunda parte ho tempu hanesan menutu 45, ekipa FC Fini domina bola iha kampu laran no hatudu vontade di’ak tanba maioria domina kampu.
Vontade ne’e hatudu rezultadu di’ak tanba jogu foin la’o iha menutu lima nia laran, kapitaun FC Fini, Filipe Taek lansa-tán golu dahaat hodi muda rezultatadu sa’e tán 4-0.
Iha golu dahuluk iha jogu faze daruak ne’e, ekipa FC Villanos komesa troka jogadór sira na’in-tolu tama tutuir malu, hanesan jogadór Lenadro Monteiro númeru kamizola 16 troka jogadór Elgar Taimenas númeru kamizola 4.
Tuir mai jogadór Roque Maniquim númeru kamizola 15 troka jogadór Jefriano Caba númeru kamizola 8, no jogadór Casemiro Taimenas númeru kamizola 19 troka jogadór Jacinto Sacramento númeru kamizola 13.
Ho estratéjia foun ne’e lori sorti di’ak ba FC Villanos, jogu to’o menutu 20 jogadór Martinho Monteiro númeru kamizola 7 lansa golu dahuluk hodi muda rezultadu ba 1-4.
Ho rezultadu ne’e, ekipa FC Fini revolta iha menutu 21 liuhosi jogadór Filipe Taek númeru kamizola 11 lansa-tán golu ida hodi muda rezultadu sa’e-tán ba 5-1.
Jogu komesa manas liután ekipa rua ne’e hatudu tátika oinoin lansa kontra no atake ba malu, ikus mai FC Villanos lansa-tán golu ida iha menutu 26 liuhosi jogadór Favião Taimenas, ho númeru kamizola 18.
Entretantu, durante jogu hahú hosi primeira no segunda parte ho durasaun menutu 90, lidera hosi árbitru, Agustinho Mota ho nia asistente Fernando Oqui, liña dahuluk Octaviano da Cruz, no liña daruak agostinho Mendonca.
Notísia relevante: Árbitru 32 iha Oé-Cusse hetan formasaun téknika hosi FFTL
Iha biban ne’e, Vise-Prezidente Assiasaun Futeból Oé-Cusse (AFO) , Julio Coel, informa, jogu ne’e rejista iha 2022 hamutuk klube ualu (8) maibé klube neen de’it mak prienxe kritéria.
“Ohin hanesan jogu ikus, eventu Telkomcel-Cup ne’e, abertura iha 17, jogu ne’e la’o durante loron 10 klubu haat mak konsege tama finál, agradese ba jogadór no treinadór sira tanba kontribui durante jogu la’o amizade tebes,” Julio Coel orgullu.
Adjuntu Prezidente Autoridade RAEOA, Maximiano Neno, hateten, eventu sira hanesan ne’e, la’os ba futeból de’it, maibé iha nia impaktu sosiál ne’ebé halo ema sai amizade hametin unidade ema bele hasoru malu konetnte mai asiste jogu halo ezersísiu.
Nune’e mós iha nia impkatu ekonomia, tanba komunidade sira-ne’e hala’o negósiu ki’ik fa’an nesesidade bázika tiga roda, sira bele hetan rendimentu.
“Tan ne’e sei iha atividade sira-ne’e, signifika ita mós kontribui hodi hasa’e kresimentu ekonomia iha ita-nia rai liuliu iha Oé-Cusse,” nia afirma.
Nu’udar reprezenta Autoridade RAEOA, hato’o agradese ba ekipa AFO FFTL no Telkomcel inklui seguransa PNTL no F-FTL tanba durante implementasaun torneu ne’e situasaun la’o hakmatek no kontroladu.
Prémiu
Purtantu, rezultadu hosi eventu ne’e primeiru lugár okupa hosi FC Fini hetan prémiu $200,00, segundu lugár okupa hosi FC Villanos hetan prémiu $150,00, terseiru lugár okupa hosi FC Klefos hetan prémiu $100,00, no kuartu lugár okupa hosi FC Jugos hetan prémiu $50,00.
Mellor jogadór Klasifikasaun
Mellór markadór ka golu barakliu iha sia (9) hosi jogadór FC Fini, Natalino Lalisuk, hetan prémiu $25, no mellór jogadór okupa hosi jogadór Martinho Monteiro hosi FC Villanos hetan prémiu $25, nune’e mós mellór guarda redi hosi jogadór Rivaldo T. Sila hosi FC Fini no hetan prémiu $25.
Jornalista: Abílio Elo Nini
Editór: Evaristo Soares Martins
