AFO rejista klube futeból neen kompete eventu Telekomsel iha Oé-Cusse
OÉ-CUSSE 29 maiu 2023 (TATOLI) – Prezidente Asosiasaun Futeból Oé-Cusse (AFO) Rejiaun Adminitrativa Espesiál Oé-Cusse Ambeno (RAEOA), Arnold Suni, informa, daudaun ne’e klubu futeból neen (6) rejista ona iha AFO hodi partisipa jogu iha eventu Telekomsel períodu 2023 ne’e.
Arnold Suni, hatete, iha semana kotuk AFO partisipa iha diskusaun nasionál, salaun FFTL hamutuk ho Telekomsel, iha tinan rua kotuk, tanba iha kooperasaun di’ak entre FFTL ho Telekomsel Indonézia ba parte bola ninian.
“Tinan kotuk realiza de’it iha nasionál maibé tinan ne’e, ita atu halo selesaun ba nasionál tanba taxa ne’e iha nasionál, tan ne’e iha Oé-Cusse, ita fahe ona informasaun ba klubu 28 maibé atu prienxe kritéria iha de’it klubu neen (6) mak AFO rejista ona atu partisipa iha eventu ne’e atu tama selesaun semak manán kontinua ba rejionál mak ba nasionál,” Arnold Suni, informa ba jornalista sira iha Oé-Cusse, segunda ne’e.
Tuir nia, kaléndariu ba eventu ne’e, sei abertura iha 17 junho fulan oin, iha eventu ne’e klubu ne’ebé sai primeiru ni segundu lugár, sei kontinua ba joga iha nivél rejionál iha munisípiu Ermera.
“Iha Ermera semak liu sai vensedór hosi primeiru to’o terseiru lugár sei kontinua ba partisipa iha nasionál Díli, to’o Díli mak foin hetan taxa, maibé iha Oé-Cusse hanesan selesaun de’it,” nia katak.
Nia akresenta, programa nu’udar permanente tanba kooperasaun entre Telekomsel ho FFTL sei realiza kada tinan, no prioridade ba sub-17 mai kraik sei idade liu 17 ba leten lá autoriza.
Notísia relevante: Árbitru 32 iha Oé-Cusse hetan formasaun téknika hosi FFTL
Jornalista: Abílio Elo Nini
Editór : Rafael Ximenes de A. Belo
