MAE kontribui reseita $15.849.15 ba kofre Estadu
DILI, 14 jullu 2023 (TATOLI)–Ministériu Administrasaun Estatál (MAE), iha tinan 2023 ne’e, kontribui reseita hosi fonte estasionamentu hamutuk $15.849.15 ba kofre Estadu.
“Ba estasionamentu iha sidade Dili, ami hatama ona reseita hamutuk $15.849.15 maibé ita sura hosi ezisténsia estasionamentu komesa hosi 2017-2023 hamutuk $181.499.15,” Xefe Departamentu Asisténsia Urbana iha Ministériu Administrsaun Estatál (MAE), Abel Bere, hateten ba Agência Tatoli iha nia kna’ar fatin Colmera, sesta ne’e.
Reseita hosi estasionamentu ne’ebé MAE rekolla hahú hosi 2017 to’o 2023 ne’e ho totál hamutuk $181.499.15, no, tinan 2017 ne’e konsege rekolla $8.011,80; tinan 2018 hamutuk $27.702.60; tinan 2019 hamutuk $27.591.15; tinan 2020 iha $11.792.00; tinan 2021 iha $17.717.09; tinan 2022 iha $31.908.05 no tinan 2023 ne’e MAE rekola hosi fonte estasionamentu ne’e hamutuk $15.849.45.
Reseita hosi fonte estasionamentu hirak ne’e, nia dehan, kobre hosi estasionamentu Merkadu Taibese, Colmera, Avenida Liberdade Imprensa, Avenida 20 de Abríl, Travessa Tafui, Jardin 5 de Maio no Avenida 25 de Maio.
Husu kona-ba pesoál ne’ebé halo kobransa iha kada estasionamentu, nia hatán, ida-ne’e la’ós MAE nia responsabilidade maibé ida-ne’e Autoridade Munisípiu Dili (AMD) nia responsabilidade.
Estasionamentu ne’ebé mak implementa iha kapitál Dili ne’bazea ba dekretu-lei Númeru 3/2017, 22 marsu, kona-ba zona estasionamentu ho durasaun limitada.
Jornalista : Osória Marques
Editór : Cancio Ximenes
