PNTL Baucau preparadu asegura ordenasaun episkopál Bispu Dioseze Baucau
BAUCAU, 17 jullu 2023 (TATOLI) – Komandu Polísia Nasionál Timor-Leste (PNTL) munisípiu Baucau preparadu asegura serimónia ordenasaun episkopál no toma pose Bispu foun Dioseze Baucau.
Komandante PNTL Baucau, Superintendente Xefe, António de Sá, koordena ona ho Komisaun Organizadora eventúal kona-ba prosesu seguransa iha Igreja Katedrál Vila Antiga no garante serimónia istóriku refere sei la’o ho susesu.
“Komandu halo ona koordenasaun ho komisaaun atu koloka membru iha arreadór Igreja Katedrál,” Komandante PNTL Baucau hateten iha Vila Nova, segunda ne’e.
Komandu Baucau iha ona planu operasaun kona-ba seguransa iha eventu sagradu refere liuliu ba bainaka hosi estranjeiru no nasionál inklui sarani hosi dioseze rua seluk no parókia Dioseze Baucau nian.
PNTL Baucau liuhosi eskuadra Baucau Vila atuál koloka ona membru sira hodi asegura seguransa durante prosesu preparasaun molok loron serImónia misa ba ordenasaun episkopál Bispu Dioseze Baucau nian.
Tuir planu PNTL sei aplika rute estrada úniku nune’e fasilita movimentasaun transporte no bainaka VIP sira molok to’o iha fatin serimónia.
“Ita tenke mantein imajen iha ita-nia munisípiu Baucau tanba eventu ne’e istóriku,” António de Sá akresenta.
PNTL Baucau sei koordena ho komandu nasionál atu apoia tán membru rezerva tanba membru Polísia iha Baucau nain-100 resin de’it nune’e la sufisiente atu asegura seguransa iha loron ordenasaun episkopál.
Tuir planu serimonia ordenasaun episkopál no toma pose Bispu foun Dioseze Baucau, Dom Leandro Maria Alves sei realiza iha loron sesta, 21 jullu semana ne’e.
Jornalista : Natalino Belo
Editór : Evaristo Soares Martins
