Governu sei kria sentru atendimentu ba idozu iha munisipiu hotu
DILI, 18 jullu 2023 (TATOLI)—Primeiru-Ministru (PM), Kay Rala Xanana Gusmão, hateten iha programa IX Governu kKnstituisionál prevee sei kria sentru atendimentu ba idozu iha munisípiu hotu.
Notísia Relevante: IX Governu sei kria Fundu Veteranu
“Apoia idozu sira liu-liu no ho urjénsia ba sira ho idade superiór ba 70 anos, no kriia sentru atendimentu ba idózu iha munisípiu sira hotu no buka hala’o programa ba tempu livre no terápia okupasionál ba ferik ho katuas sira,” PM Xanana hato’o liuhosi debate loron dahuluk ba programa IX Governu Konstituionál iha Parlamentu Nasionál, tersa ne’e.
Tuir dokumentu IX Governu konstituisionál ne’ebé Agêéncia TATOLI asesu, ba programa kontinua ho dezenvolvimentu hosi kapitál sosiál ba iha idozu mak sidadaun hotu-hotu terseira idade nian iha direitu ba protesaun espesiál hosi parte Estadu.
Polítika kona-ba terseira idade engloba medida ho karáter ekonómiku, sosiál no kulturál, hodi proporsiona ba idozu, oportunidade ba realizasaun pesoál, liuhosi partisipasaun ida-ne’ebé digna no ativa iha vida komunidade.
Maibé, Estadu mós tenke rekoñese katak la’ós de’it Gerrilleiru sira mak luta no la’ós de’it Ema hotu ne’ebé partisipa iha Rede Klandestina mak luta ba Libertasaun da Pátria. Ba sidadaun ne’ebé fó apoiu ba Rezisténsia, Estadu tenke fó rekompensa sira ba atividade ne’ebé sira hala’o durante Rezisténsia.
Ne’eduni, IX Governu Konstitusionál sei tau matan liuliu ba Idozu sira, ho idade liu ona tinan 70, tanba kamada boot populasaun nian ne’ebé terus hosi kedas hahú funu libertasaun nian, ho sakrifísiu oioin, lakon família ne’ebé mate tanba ema oho, tanba hamlaha no moras no ikus mai, iha tinan 1999, enfrenta (hasoru) ameasa hotu-hotu hodi la hakiduk atu ba tú iha Referendu ba Ukun Rasik Aan.
Sira mak Erói Vivu, ne’ebé Estadu tenke hakruuk ba, tanba sira-nia sakrifísiu sira no liuliu, sira nia desizaun ne’ebé berani atu Vota ba Ukun Rasik-aan. Sira mak ta’uk no la ba Vota, Membru Organizasauns klandestina nia Votus sei la to’o, tanba guerrilleiru mós la vota, tuir instrusaun hosi Komandu Superiór Luta.
Tan ne’e, IX Governu KOnstitusionál tenke fó atensaun boot liu ba idozu ne’e, ne’ebé bele bolu ‘Erói Vivu’. Ho ne’e hotu, mak Governu sei:
- Hasai norma ne’ebé konkreta, hodi halo urjentemente levantamentu ba idozu ho idade liu tinan 70, nune’e sira bele hetan apoiu ne’ebé boot liu, hodi hamenus matan-ween iha sira-nia loron ikus sei moris:
- Kontinua fó subsídiu pekuniáriu (osan) ba idozu, liuhosi Subsídiu Apoiu ba Idozu sira ho Inválidéz (SAII);
- Kria Sentru Atendimentu ba idozu iha munisípiu sira hotu;
- Dezenvolve kampaña kona-ba idozu nia direitu no promove sira-nia integrasaun ho kuidadu sira espesiál iha família no iha komunidade;
- Kria programa kona-ba Tempu Livre/Espasu Konvíviu/Terapia Okupasionál ba idozu, hodi promove nia bein-estár ho integrasaun iha sosiedade (bele inklui atividade desportiva, arte, téknolojia tradisionál hanesan olaria ho artezenatu, pintura, paseiu ka hanesan de’it espasu ba konvíviu).
Jornalista : Nelson de Sousa
Editór : Cancio Ximenes
