AMD rekoñese sidade Dili seidauk organizadu
DILI, 24 jullu 2023 (TATOLI)–Diretór Servisu Munisipál Jestaun Merkadu no Turizmu, Arthur Henriques, hateten Autoridade Munisípiu Dili (AMD) rekoñese sidade Dili seidauk organizadu tanba menus rekursu umanu.
“Ami rekoñese sidade Dili rungu-ranga. Seidauk bem organizadu maibé atu solusiona kestaun ne’e mak tenke estabelese merkadu, nune’e bele akumula ema no redús ema faan iha dalan públiku no mós pelumenus rezolve netik negosiante ambulante nia situasaun. Ho nune’e, ita bele haree sidade Dili ne’e organizadu, moos, furak no atrai ema atu ba vizita ita-nia área truzimu hanesan Hera inklui Cristo Rei nian,” Arthur Henriques hateten ba Agência Tatoli, iha nia kna’ar fatin. Matadouro, segunda ne’e.
Arthur hateten, durante ne’e merkadu Manleuana organizadu tebes tanba kalan portaun taka no ema la toba iha laran, maibé problema mak ba negosiante iha Manleuana mak kuandu fila ba faan fali iha dalan públiku hanesan Elemloi ho Kampung Baru nian.
“Ita ulun moras tanba ema seidauk iha konxiénsia. Fatin rua ne’e desorganizadu. Agora liga ba Merkadu Taibesi, komunidade halo uma iha laran no permanente tiha. Ida-ne’e dezde lideransa Gaspar Soares nia tempu. Defisil uitoan ita atu halo mudansa tanba uma metin iha laran. Anaunsér ita estabelese tan merkadu ida para bele akumula ema iha laran,” nia dehan.
Kona-ba estasionamentu iha Kapitál Dili, nia dehan, segunda to’o sesta pesoál kobransa sora iha no kontrola maibé liu oras servisu no sábadu ho domingu ema laiha, entaun vendedór faan to’o mai estrada.
“Kestaun ne’e ita planu ona no iha tinan 2024, ami sei koloka funsionáriu iha ne’ebá. Maibé la’ós ida-ne’e de’it, munisípiu Dili mós planu hadi’a merkadu ida iha Metinaro. Agora, ami halo planu ba orsamentu retifikasaun ne’e sei halo manutensaun ba Merkadu Taibese no Manleuana, tanba problema boot iha merkadu ne’e mak kanalizasaun bee-moos, sanitária. Ida-ne’e ami presiza $100.000,” nia esplika.
Jornalista : Osória Marques
Editór : Cancio Ximenes
