Top

PNTL kaptura ona autór soe Bebé iha Baucau

Bebé feto ema deskoñesidu soe iha aldeia Lutumutu, suku Tirilolo atuál sei kontinua baixa iha HorEX Baucau ho kondisaun normál, kuarta (19/07). Imajen espesiál.

BAUCAU, 19 jullu 2023 (TATOLI) – Komandu Polísia Nasionál Timor-Leste (PNTL) munisípiu Baucau kaptura ona autór soe Bebé feto ne’ebé akontese iha aldeia Lutumutu, Tirilolo, Baucau Vila.

Komandante PNTL munisípiu Baucau, Superintendente Xefe, António de Sá, esplika, liuhosi esforsu serbisu polisiamentu komunitária konsege kaptura autór iha área Watulete, Vila Nova, suku Tirilolo loron-sesta, 21 jullu.

“Kazu ne’e prosesu normál tanba alin-feto ne’e alende sai vítima, sai mós suspeitu nune’e reintrega hikas ba família hodi aplika Termu Identidade Rezidénsia no sei kontinua ba oin,” Komandante PNTL Baucau hateten iha Vila Nova, segunda ne’e.

Superintendente Xefe de Sá, hateten, liuhosi prosesu investigasaun identifika autór feto inisiál AB idade 15 nu’udar inan ba bebé feto ne’e.

Bebé nia inan nu’udar estudante hosi ensinu sekundária públiku númeru 01 Vila Nova, Baucau.

Alende ne’e, PNTL Baucau identifika ona suspeitu mane kazál na’in-rua ne’ebé deskonfia iha relasaun hodi ikus mai fó oan ba autór feto refere.

Entretantu bebé feto ne’ebé AB soe hakotu ona iis iha loron-22 jullu, iha Ospitál Rejionál Eduardo Ximenes (HorEX, sigla portugés) munisípiu Baucau.

Bebé refere moris ho kondisaun inisiál menus hosi normál ka seidauk to’o tempu atu partu nune’e labele salva, maske esforsu ona hosi profisionál saúde sira.

Iha loron-18 fulan jullu Bebé feto soe iha área Waituni, bairru Uatulete, aldeia Lutumutu, Suco Tirilolo hafoin hetan hosi Andri Marcel Belo Casameta idade 12, purvolta oras 05:30 lokraik.

Jornalista    : Natalino Belo 

Editór          : Evaristo Soares Martins 

Publisidade

Leave a Reply

Latest Post

error: Content is protected !!