Komunidade preokupa ahi lakan-mate iha Bobonaro no Lolotoe
MALIANA, 25 jullu 2023 (TATOLI)-Komunidade ho autoridade lokál sira preokupa ahi eletrisidade ne’ebé durante ne’e lakan mate iha postu administrativu Bobonaro no Lolotoe, munisípiu Bobonaro.
Xefe suku Lontas, postu administrarivu Lolotoe, Alipio Belo, hateten foin lalais ne’e ahi sei lakan normál hela, maibé durante semana ida ona sempre lakan-mate, maske laiha udan no anin.
Notísia relevante: EDTL rezolve hela ahi mate iha Bobonaro-Lolotoe no Atsabe
“Ami-nia ahi tama ona, maibé dalaruma kalan ho loron ahi sempre lakan mate, ami lahtene ne’e tanba saida, ida-ne’e hamate tebes atividade estadu nian, dalaruma mós estraga ema-nia sasán eletróniku sira, liuliu negosiante sira-ne’ebé loke kioske, ahi mate lakan beibeik sira-nia sasan jelera ne’ebé tau ayam potong dodok hotu,” nia informa ba Jornalista Tatoli, tersa ne’e.
Nia dehan, problma ne’e sempre akontese tanba EDTL la tesi ai-hun boot ne’ebé mak besik liña distribuisaun média no baixa tensaun nune’e bainhira akontese udan no anin labele fó impaktu ba liña refere.
Nia hatutan, problema seluk mak menus rekursu umanu atu halo kontrolu masimu ba fasilidade no ekipamentu sira, tanba iha Lolotoe EDTL koloka tékniku na’in-rua de’it.
“Se bele Nono Governu liuhosi diresaun EDTL, koloka se bele rekruta pesoál tenki ne’e kada suku atubele kobre hotu, tanba funsionáriu na’in-rua de’it ne’e labele kobre no identifika hotu problema ne’eb’e akontese iha Lolotoe, hakarak ka lakoi ahi iha Lolotoe tenke mate to’o semana ka fulan.
Komunidade suku Malilait, postu Bobonaro, Marcos Perreira, sente triste haree situasaun ne’e, tanba kuandu ahi mate difikulta halo atvidade iha tempu kalan, liuliu oan sira atu estuda.
“Ami lor-loron hola pulsa, maibé ahi ida ne’e kalan loron mak mate hela de’it, ami la hatene ne’e ami mak sala ka EDTL sira, favór ida boot sira haree lai problema ne’e,” nia hateten.
Hatán ba preokupasaun ne’e, Koordenadór EDTL,E.P munisípiu Bobonaro, Mario de Jesus, rekoñese ahi iha Lolotoe no Bobonaro lakan mate duni, tanba impaktu hosi klima.
“Iha-ne’ebá ne’e anin ho udan, agora daudaun ne’e anin mak maka’as, entaun fiu sira sempre monu, ai-horis ruma tula-an ba lina leten, estraga ita-nia sasán hanesan, isolator PIN, isolator PAM kotu, entaun ita-nia tékniku sira buka nia motivu avaria ne’e ho manuál, sira la’o tama sai kintu kantu, atubele identifika avaria ne’e,” nia justifika.
Konaba atu aumenta rekursu umanu hodi kobre suku-suku iha postu rua ne’e,Mario de Jesu,dehan iha nesesita duni,maib’e ne’e kompetensia ba governu liu-liu ezekutivu sira EDTL,E.P nasionál.
Nia apela ba kliente sira iha postu administrativu Lolotoe no Bobonaro bainhira akontese ahi lakan-mate desliga kedas sasán eletroniku sira hanesan jalera, televizaun no seluk tan.
“Se kuandu ahi moris fila fali tenke hein lai 10 ou 15 minutu mak foin bele hamoris fila-fali sasan sira-ne’e,” nia fó hanoin.
Enkuantu tuir dadus kliente EDTL,E.P iha munisípiu Bobonaro mai hosi suku 50, postu administrativu neen hamutuk 16,762.
Notísia relevante: EDTL Bobonaro rekolla reseita $470,495.88
Jornalista: Sérgio da Cruz
Editór: Evaristo Soares Martins
