DILI, 03 agostu 2023 (TATOLI)—Diretór Sektretariadu Tékniku Administrasaun Eleitorál (STAE) Manatuto, Mariano Natalino Soares, hateten STAE Manatuto presiza pesoál STAE Apoiu Suku no Pesoál STAE Apoiu Aldeia (PSAS-PSAA) 237 ba eleisaun xefe suku.
“Nune’e, ami presiza ema hamutuk 237. Hosi ne’e pesoál STAE apoiu aldeia koloka 206 tanba kada aldeia sei destaka ema na’in-rua. No, ema na’in-31 koloka ba suku no sei destaka ema ida iha suku ida. STAE Manatuto, agora halo hela preparasaun ba eleisaun suku nian, nune’e halo hela rekrutamentu ba operadór sistema no asisténsia ida hodi halo resensiamentu eleitorál no atualizasaun baze dadus iha postu administrativu sira. Maibé, daudaun ne’e mós ami taka sai ona avizu ba pesoál STAE apoiu suku no pessoal STAE apoio aldeia nian,” nia hateten ba Agencia Tatoli,liuhosi telefónika, kinta ne’e.
Tanba ne’e, nia husu ba sidadaun hotu-hotu iha Manatuto, karik iha interrese bele koko no tuir rekrutamentu ne’ebé sei taka iha 11 agostu tinan 2023.
Agora daudaun, nia dehan, STAE Manatuto prepara hela ba planu Operasionál Suku nian no hosi planu ne’e mak halo levantamentu sentru votasaun asembleia nian iha Manatuto.
Durante fulan-junu ho jullu ne’e rejista eleitór 252 ne’ebé kompostu hosi junu ne’e rejista eleitór na’in-91 ho eleitór foun hamutuk 37 no eleitór atualizada 54.
Agora, nia hateten, iha fulan-jullu ne’e STAE Manatuto rejista eleitór ne’ebé atualizada hamutuk 126 no eleitór foun hamutuk 35.
Antes ne’e, tuir dadus haktuir totál eleitór hosi munisípiu Aileu hamutuk 35.128, Ainaro 48.185, Ataúro 4.288, Baucau 99.724, Bobonaro 72.951, Covalima 49.469, Dili 191.450, Ermera 85.593, Lautém 49.577, Liquiça 53.286, Manatuto 36.651, Manufahi 42.310, RAEOA 54.645, no Viqueque hamutuk 58.756.
Eleitór sira-ne’ebé rejista iha diáspora hanesan iha Austrália ne’e eleitór hamutuk 2.243, Korea Súl hamutuk 1.595, Inglatera hamuutk 3.716, Irlandia Norte hamutuk 2.418 no Portugál hamutuk 1.853.
Hosi númeru ne’e , STAE iha munisípiu sira hotu sei kontinua halo resensiamentu no atualiazasaun baze dadus iha territóriu nasionál, tanba halo preparasaun ba eleisaun xefe suku nian ne’ebé besik ona, tanba ne’e ba eleitór sira-ne’ebé foun no eleitór sira-ne’ebe sira-nia kartaun aat ka lakon ne’e bele hdki’a fali.
Jornalista : Osória Marques
Editór : Cancio Ximenes
