Abitante aldeia rua iha Atudara falta Bee-Moos
MALIANA, 07 agostu 2023 (TATOLI) – Abitante aldeia rua hanesan Atubuti no Tuturema iha suku Atudara, postu administrativu Cailaco, munisípiu Bobonaro durante ne’e enfrenta problema falta Bee-Moos atu uza ba nesesidade kada loron.
Notísia relevante: Xefe suku Atudara husu IGE kotinua mellora dalan Poerema ba Cailaco
“Ha’u-nia komunidade aldeia rua iha foho ne’e mak sei falta Bee-Moos, liuliu tempu bai-loro ne’e bee araska, tanba Bee-Matan iha okos Populasaun iha fali iha Leten, ne’ebé susar tebes ita atu dada bee-moos hosi kraik mai leten,” Xefe suku Atudara, Manuel Ximenes, informa ba jornalista sira, iha Maliana, segunda ne’e.
Líder lokál ne’e konfirma alende problema bee-moos, komunidade sira mós enfrenta problema seluk kona-bá la asesu estrada hosi aldeia ba urbana Cailaco Vila ba kapitál Maliana.
Nia dehan, eletrisidade aldeia rua iha parte Atudara foho tanba durante ne’e komunidade sira uza de’it lampu tradisionál no solár sél, maibé daudaun ne’e Governu halo ona intervensaun ba problema refere.
“Agora implementa ona, besi-rin sira-ne’e hari hotu ona, hein de’it atu halo instalasaun ba fiu eletrisidade hodi tama,” nia katak.
Líder lokál ne’e hatutan, komunidade sira-ne’ebé iha área rurál durante ne’e balu la asesu liña telekomunikasaun ka internete.
“Sira hela iha foho leten, maibé la’ós hotu-hotu hela iha-ne’ebá, balu hela mai fali iha mota-ibun, balun ita ba tiha laletek hateke tún fali. Ida-ne’e mak sira iha rai ko’ak sira ne’e araska tebes atu asesu liña internete, ne’ebé difikulta tebes sira atu hetan informasaun,” nia haktuir.
Maske nune’e, xefe suku ne’e observa iha mandatu VIII Governu Konstituisionál dezenvolvimentu iha suku Atudara la’o liuhosi Programa Uma Naroman ba Povu (UNP) no projetu PNDS sira seluk.
“Ita sente orgulu no apresia tebes ba VIII Governu ninia planu no programa, tanba iha ha’u-nia suku hamutuk uma 12 mak halo ona,” nia katak.
Suku Atudara iha aldeia haat mak hanesan; Nuaphu, Biateho, Tuturema no Atubuti ho totál uma-kain 456.
Notísia relevante: Aldeia rua iha Atudara seidauk asesu eletrisidade
Jornalista: Sérgio da Cruz
Editór: Evaristo Soares Martins
