Kompañia Zero Quatro Lifau hahú kontinua projetu ICU ho progresu 70%
OÉ-CUSSE, 08 agostu 2023 (TATOLI – Diretór Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA), Candido dos Reis Amaral, informa, kompañia Zero Quatro Lifau Unipesoál Lda, hahú ezekuta ona projetu sala Unidade Kuidadu Intensivu (ICU, sigla ingles) iha Hospitál Referál Oé-Cusse, ho progresu fíziku atinje ona 70%.
Notísia relevante: DRI ameasa hakotu kontratu kompañia Zero Quatro Lifau
“Projetu ICU, kompañia hatudu nia komitmentu atu kompleta konstrusaun ne’e, nia onestu, entaun ita fó-tán tempu ba nia, no nia hatudu nia progresu atinje ona 70%, hein de’it atu monta-tán asesoris balu tanba nesesáriu ba ICU ne’e, hanesan AC instalasaun prepara ba ekipamentu médiku nian,” Candido Amaral, ba jornalista sira iha Oé-Cusse, tersa ne’e.
Tuir nia katak, loloos kompañia entrega projetu ICU ne’e iha 11 abríl 2023 ne’e, tanba durasaun kontratu durante fulan-haat de’it, hahú iha dezembru 2022 to’o abríl 2023, maibé to’o fulan-abril seidauk remata tanba nia progresu fíziku foin atinje 30%.
Nune’e, Diresaun Rejionál Infraestrutura fó xamada atensaun, ho prazu semana rua, kompañia tenke aprezenta justifikasaun, ho razaun saida mak obra ne’e atraza.
“Maibé hafoin ita fó xamada, kompañia kumpre, ho promete atu kontinua, entaun obra ne’e agora fulan ida ona kompañia hahú kontinua projetu ne’e, ita hein katak iha setembru to’o outubru molok udan bele entrega ona ba autoridade,” nia espera.
Entretantu, konstrusaun sala Unidade Kuidade Intensivu ne’e kompañia Zero Quatro Lifau Lda, ezekuta ho valór kontratu hamutuk $219,075.50, orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian.
Durasaun ba projetu ne’e durante fulan haat, kompañia Zero Quatro Lifau Lda hahú hatuur fatuk dahuluk iha loron 10 dezembru 2022 tenke remata iha loron 11 dezembru 2023.
Notísia relevante: RAEOA aloka millaun $1-resin konstrui fasilidade saúde públika
Jornalista: Abílio Elo Nini
Editor: Evaristo Soares Martins
