Vendedór okupa trotoar iha tempu kalan ne’e hosi merkadu Manleuana-Taibesi
DILI, 08 agostu 2023 (TATOLI)—Prezidente Autoridade Munisípiu Dili (AMD), Guilhermina Filomena Saldanha, hateten vendedór sira-ne’ebé faan sasán okupa trotoar no dalan públiku iha tempu kalan ne’e mai hosi merkadu Manleuana no Taibesi.
Prezidente AMD ne’e hateten, merkadu boot rua ne’e oráriu servisu normál maibé kuandu lokraik tuku 15h00 ona, sira sempre tula karosa ho karreta lori sai hosi merkadu mai faan iha Kampung Baru, Elemloi, Audian, Comoro no Becora.
“Ita identifika katak negosiante sira-ne’ebé okupa trotoar ne’e la’ós mai husi komunidade maibé mai hosi merkadu nasionál rua ne’e. Negosiante hirak-ne’e organizadu tebes, Bainhira tuku tolu lokraik ona, sira tula gerobak ba karreta hodi faan iha dalan públiku sira. Ita haree sira rasik mak kondisiona ema hola iha dalan públiku no la ba merkadu, tanba ne’e mak Autoridade Munisípiu Díli kumpri orden nafatin hasai sira iha trotoar leten,” Prezidente AMD dehan ba jornalista sira, iha AMD Matadouro, tersa ne’e.
Tanba ne’e, Parte Jestaun Merkadu kontinua koopera no servisu hamutuk ho autoridade seguransa hodi kontrolu atividade merkadu kalan iha dalan públiku.
AMD husu labele hanoin negativu joven utiliza jardin
Husu Kona-ba dezeñu ba jardin sira iha kapitál Dili ne’e liuliu Jardin iha sede Partidu Demokrátiku nia oin, Prezidente AMD husu atu labele hanoin negativu de’it.
“Tanba, ita ukun an tinan barak ona no ha’u lakohi hatun ita-nia joven, ne’e labele. Joven sira tenke iha responsabilidade tanba ita hakarak hatene no haree katak área sirkulasaun ne’ebá ne’e perigozu, tanba ne’e ita presiza asegura. Vizitante ba iha ne’ebá presiza protesaun tanba área sirkulasaun mak perigozu,” nia dehan.
Prezidente AMD kontinua reforsa, jardin nia trianglu ne’e mak problema tanba karreta hosi fatin tolu kedas. Entaun ein termu rodoviária presiza asegura.
“Ita labele minimiza ita-nia joven, konfia ita-nia joven tanba ita nasaun demokrátiku. Nia atu loke ka taka tanba kuandu akontese ne’e akontese ona. Sira sei uza espasu públiku, buat ne’ebé loos no loloos,” nia hateten.
Polísia Nasionál Timor-Leste (PNTL) liuhosi Departamentu Tránzitu Seguransa Rodaviária Nasionál, hahú pasa revista iha Díli atu kontrola no proibe negosiante sira-ne’ebé okupa trotoár hodi halo atividade negósiu.
Atividade pasa revista ne’e bazeia ba orientasaun hosi Komandu Jerál PNTL ho objetivu atu regulariza orden públiku, atu negosiante sira labele okupa espasu públiku sai fali fatin negósiu liuliu hanesan trotoár no estrada hodi provoka engarafamentu no asidente tráfegu.
Oasa revista liderandu hosi Xefe Departamentu Tránzitu Seguransa Rodaviária Nasionál, Superinte ndente Asistente Polísia Luis da Costa, atividade hahú kedas hosi loron domingu (30/7) no kontinua horseik (31/7) ba área sira hanesan Fatuhada, Elemloi Delta, Bairu Pite inklui fatin sira seluk ne’ebé durante ne’e negosiante sira uza ba atividade negósiu hodi perturba movimentasaun transporte públika.
“Operasaun ida-ne’e tanba orientasaun mai kedan hosi Komandante Jerál ho Segundu hodi hatun ba Komandante Operasaun Nasionál katak Tránzitu Nasionál tenke servisu hamutuk ho Tránzitu Komandu Munisipiu Díli atu bele neutraliza no normaliza transporte sira hosi engarafamentu iha Díli laran,” Komandante PNTL Munisipiu Dili, Superintendente Xefe Polisia, Orlando Gomes dehan.
Jornalista : Osória Marques
Editór : Cancio Ximenes
