Labarik balu iha postu Bobonaro pezu hahú mudansa
MALIANA, 11 agostu 2023 (TATOLI) – Sentru Saúde Komunitária (SKS), postu administrativu Bobonaro, munisípiu Bobonaro, liuhosi aktividade triajen identifika katak pezu ka todan labarik sira tinan 0-5 iha postu administrativu Bobonaro balu hahú mudansa hafoin simu subsídiu Bolsa da Mãe Jerasaun Foun.
Xefe sentru saúde Bobonaro, Domingos Mesquita da Silva, konfirma durante implementasaun programa refere iha faze dahuluk ekipa saúde konsege halo atendimentu ba labarik na’in-275 no fó konsulta ona inan isin-rua na’in-73.
Nia hatutan, mai fali faze daruak hafoin simu subsídiu durante fulan ida nia laran ekipa saúde mós sei halo tan triajen dala ida atu haree pezu labarik iha mudansa ka lae.
Notísia relevante: MSSI hahú selu benefisiáriu bolsa da mãe kondisionál 45.386
“Implementasaun primeiru labarik sira ami sei alista hotu, sira-nia gráfiku atu sira-nia rejistu ba nutrisaun nia ne’e ami-nia gráfiku iha, mai fali iha segundu iha, signifika sira hetan tiha subsídiu inan-aman sira fó haan duni labarik, tanba mai fali segundu ne’e ami tetu labarik balu iha mudansa no balu lae tanba isin mak hanesan ona, kuaze 10% ka %5 mak laiha mudansa,” nia ko’alia ba Tatoli, iha Maliana, kinta ne’e.
Hosi dadus labarik sira-ne’ebé pezu sei laiha mudansa ekipa saúde sira kontinua halo promosaun liuhosi programa demo cocking.
“Ami tama sai suku no aldeia oinsá ami halo hahán ne’ebé maka kualidade, hanesan te’in sasoro no kahur ho ida-ne’e, agora ami la’o ona programa ne’e,” nia katak.
Biban ne’e xefe sentru ne’e observa katak ho implementasaun programa refere inan isin-rua no labarik sira partisipasaun masimu iha konsultasaun primeiru (K1),segundu to’o konsultasaun dahaat (K4).
Tanba ne’e Jerente sentru saúde Bobonaro ne’e husu ba IX Governu atu kontinua implementa programa refere nune’e bele aumenta kobertura konsultasaun inan isin-rua iha fasilidade saúde.
Bolsa da Mãe Jerasaun Foun mak programa transferénsia osan husi sistema asisténsia sosiál ne’ebé kompostu ba subsídiu $15.00 kada futan ba inan isin-rua sira durante períodu kous no $20.00 kada fulan ba labarik tinan zero to’o tinan tolu (0-3) no sei kontinua to’o labarik tinan neen (6), ho suplementu adisionál $10.00 kada fulan bainhira labarik ho moras króniku ka defisiénsia.
Alende subsídiu osan kada fulan, programa Bolsa da Mãe — Jerasaun Foun mós fornese akonsellamentu kona-ba saúde husi pesoál saúde sira inklui ba kuidadu saúde durante períodu isin-rua, periódu primeira infánsia inklui imunizasaun, nesesidade hahán nutritivu ba família no prátika ijéniku no sanitasaun.
Programa ne’e nia objetivu prinsipál atu mellora rendimentu familiár, estímula erradikasaun pobreza no hamlaha, melloramentu saúde no nutrisaun inan isin-rua no labarik. Nune’e mós promove atividade ekonomia lokál no hasa’e kualidade edukasaun hodi kontribui ba atinjimentu objetivu dezenvolvimentu sustentável.
Enkuantu valór transferénsia maka dolar $15 kada fulan ba subsídiu inan isin-rua no dolar $20 kada fulan subsídiu ba oan ida iha 2022, maibé valór ne’e sei revee hodi ajusta ho kada tinan bazea ba taxa inflasaun.
Programa ne’e lansamentu nasionál iha munisípiu pilotajen tolu mak hanesan Oe-Cuse, Ainaro no Bobonaro hanesan tanba munisípiu hirak-ne’e mak bazea ba indikadór kombinadu ra’es badak no kiak aas liu no progresivamente sei estende ba munisípiu sira hotu.
Governu implementa programa ne’e hodi korresponde ba realidade iha Timor-Leste nian tanba númeru má-nutrisaun no ra’es badak kontinua rejista aas.
Notísia relevante: MSSI rekruta pesoál rejistu ‘bolsa da mãe jerasaun foun’ hamutuk 135
Jornalista : Sérgio da Cruz
Editór : Evaristo Soares Martins
