MALIANA, 12 agostu 2023 (TATOLI) – Asosiasaun Fúteból Bobonaro (AFB) lideradu Domingos Gouveia Moniz ‘Tanenti’, preokupa ho kondisaun estádiu Malibaka Yamato Maliana tanba du’ut iha kampu laran naruk hotu no fasidade sira barak mak hetan estragu no la funsiona.
Domingos haktuir asosiasaun hasai rasik osan hodi aluga mákina no selu ema tesi hotu du’ut no hamos tribuna sira para bele realiza jogu sub livre taxa rotativa AFB epoka 2023 inklui preparasaun ba jogu rejionál sub-17.
Nia konfirma, asosiasaun hola inisiativa refere tanba empreza ne’ebé Governu kontrata atu halo manutensaun ba estádiu refere la responsabiliza ninia servisu maske parte AFB tenta halo bebeik koordensaun servisu.
“Ami rona katak empresáriu ne’e por mes ne’e hetan $2000 atu halo manutensaun ba kampu liuliu tesi no rega du’ut no fasilidade sira seluk ne’e responsabilidade kompañia nian maibé realidade bee la la’o, fasilidade sira a’at hotu, Casa de Banho la funsiona”, Domingos Gouveia Moniz informa ba jornalista sira iha estádium Malibaka, sesta ne’e.
Ligadu ho kestaun ne’e, Domingos Gouveia, husu ba Ministériu Juventude no Desportu atu entrega estádiu refere ba AFB mak kontrola direta.
Nia afirma, AFB prontu tau-matan ba estádiu refere bainhira ministériu entrega kompeténsia tomak tanbá asosisaun la hetan osan hosi Governu mós bele halo manutensaun ba kampu refere.
“Ida ne’e asosisaun nia servisu duni atu halo manutensaun ba ida ne’e hodi núne’e estádiu ne’e kualidade du’ut sira ne’e ita sei asegura hotu, se lae du’ut sira ne’e mate, tanbá emprezáriu ne’ebé toma responsabilidade ba kampu ida ne’e la halo buat ida, du’ut barak mate asosisaun mak hasai fali osan hadia fali”, nia katak.
Enkuantu tuir observasaun Agensia Tatoli iha terrenu nota katak tur fatin ba jogadór rezerva sira mos ai ho triplex sira balun komesa nakles no lahuk ona no kampu refere asegura hela hosi seguransa hosi Kompañia PAX.
Jornalista: Sergio da Cruz
Editor: Zezito Silva
