Governu husu vendedór faan iha dalan públiku muda ba merkadu Taibesi
DILI, 15 agostu 2023 (TATOLI)—Gvernu liuhosi Sektretariadu Estadu Asuntu Toponímia no Organizasaun Urbana (SEATOU), Germano Santa Brites, husu vendedór ne’ebé faan iha dalan públiku atu faan iha merkadu Taibesi no labele buka razaun tanba ema la sosa sasán.
“Merkadu ne’e hodi faan sasán la’ós buka razaun dehan ema la ba sosa, ida-ne’e buat ketak. Oinsá ho ema ne’ebé nafatin iha merkadu ne’e, agora faan tiha dalan públiku hodi halo engarrafamentu inklui halo ema-nia produtu ne’ebé faan iha merkadu la folin. Hotu-hotu ba iha ne’ebá, nune’e halo kompetisaun ba nia produtu ne’ebé faan,” nia dehan ba jornalista sira iha merkadu Comoro, tersa ne’e.
Nia hatutan, ho nune’e mak merkadu organizadu no lixu tenke tau iha fatin ne’ebé Governu prepara ona, maibé agora faan iha dalan públiku sira-ne’e husu atu labele soe lixu iha estrada boot.
“Estadu no Governu kolen ona ho lixu ne’ebé la tau nia fatin. Autoridade Munisípiu Dili hasai ona orden ba territóriu katak oras soe lixu iha lorokraik 18h00-06h00. Hosi oras ne’e ba leten, ekipa jestaun lixu ba rekolla no soe,” nia hateten.
Tanba ne’e, nia husu komunidade atu koopera hodi Dili moos no furak, se lae Dili sai sidade lixu, njune’e komunidade laiha razaun atu kontra regra ne’ebé fó sai maibé tenke respeita ba regra ne’ebé iha ona.
Ho nune’e, nia servisu hamutuk ho ekipa jestaun merkadu no aplika orientasaun klaru atu negosiante timoroan sira iha konxiensia no responsabilidade morál kumpre ba Lei no regra Estadu hasai ona, liuhosi munisipiu Dili orienta ba sira atu kumpre.
Aleinde ne’e, membru Governu ne’e husu ba vendedor timoroan no xineza sira-ne’ebé faan sira-nia produtu no sasán okupa espasu públiku atu iha konxiensia hodi kumpre ba lei.
Nia apela ba vendedor sira atu tau responsabilidade boot hodi respeitu espasu públiku no respeitu ba sidadaun seluk nia direitu, tanba espasu públiku ne’e ema hotu iha direitu atu asessu.
Tanba ne’e, dever Governu nian mak atu aplika orden públiku ba sidadaun hotu atu kumpre ba lei no regra ne’ebé Estadu hasai ona.
“Negosiante timoroan no xineza barak loke sira-nia loja no baranda mai liu tiha trotoar hodi prejudika sidadaun la’o ain sira la’o fali iha Estrada, ne’e la di’ak no ita tenke iha konxiénsia,” nia dehan.
Jornalista : Osória Marques
Editór : Cancio Ximenes
