DILI, 16 agostu 2023 (TATOLI)—IX Governu Konstituisionál liuhosi Ministéiru Finansa (MF) pretende atu halo alterasaun ba lei númeru 2/2022, 10 fevereiru, Enkuadramentu Orsamentu Jerál Estadu no Jestaun Finanseira Públika ba artigu hamutuk 18.
Notísia Relevante: Posibilidade Governu revee Lei Enkuadramentu Orsamentál
“Liga ho artigu hamutuk 18 ne’ebé ita revoga hosi lei Enkuadramentu Orsamentu Jerál Estadu no Jestaun Finanseira Públika ka dala barak ita bolu Lei Enkuadramentu Orsamentál (LEO),” Vise Ministru Finansa (MF), Helder Lopes, hateten bainhira hala’o audiénsia públika ba proposta lei Orsamentu Retifikativu (OR) 2023 ho komisaun espesializada sira iha PN, kuarta ne’e.
Iha proposta Orsamentu Retifikativu (OR) 2023 ne’e, Governu aprezenta ho pedidu karáter urjénsia no Governu aprezenta mós alterasaun dahuluk lei númeru 15/2022, 21 dezembru, Orsamentu Jerál Estadu (OJE) ba 2023, no lei númeru 2/2022, 10 fevereiru, Enkuadramentu Orsamentu Jerál Estadu no Jestaun Finanseira Públika no alterasaun daruak lei númeru 8/2008, 30 juñu, Lei Tributária.
Tuir proposta Governu atu halo alterasaun ba lei vijente lei númeru 2/2022, 10 fevereiru, Enkuadramentu Orsamentu Jerál Estadu no Jestaun Finanseira Públika ba artigu hamutuk 18 mak hanesan iha artigu 4, 14, 16, 41, 44, 47, 48, 49, 52, 62, 66, 68, 74, 88, 95, 97, 103, 105 no aditamentu artigu 68 –a Rejime ezekusaun orsamentál antes apresiasaun progama Governu ou após a sua rejeição.
Vise Ministru Finansa ne’e hateten, alterasaun artigu sira-ne’e liga iha ne’e oinsá ita halo definisaun klareza kona-ba reseita no saldu jerénsia, katak bainhira osan ne’ebé kada tinan instituisaun Estadu ida la konsege ezekuta hotu, ida-ne’e ita tenke konsidera hanesan saldo labele konsidera hanesan reseita, atu nune’e re-orsamenta fali hodi finansa kontrola.
“Ida fali mak artigu balun liga prosesu lei Grande Opsaun Planu, tuir Governu nia hanoin ne’e di’ak, maibé komplika prosesu aprezentasaun programa no orsamentu ba Parlamentu Nasionál. Entaun, ita hakarak revoga tiha ida-ne’e mai ho aprezentasaun planu no orsamentu ba PN ne’e mai dala ida de’it iha proposta Orsamentu Jerál Estadu (OJE),” nia hateten.
Nia hatutan, ida tan mak revoga artigu balun tanba rekomendasaun hosi PN rasik no Tribunál Konta kona-ba konta jerál Estadu nian, tan ne’e revoga hodi akomoda aspirasaun hotu-hotu ho nosaun ida katak hakarak hametin no promove transparánsia akuntável ka responsabilidade no efisiénsia iha prosesu elaborasaun Orsamentu Jerál Estadu (OJE) no konta públika.
Deputada bankada PLP, Maria Angelina Sarmento, hateten hanesan surpreza uitoan tanba Governu lori proposta OR mai kedas mós ho proposta alterasaun esensiál tebes hanesan lei LEO ligadu ho hamutuk 18 tama atu halo alterasaun.
Mezmu iha lejislatura anteriór atu aprova lei ne’e presiza lori tempu naruk tebes, maibé Governu ida-ne’e uza proposta OR hodi lori ho lei ne’e mai, mezmu haree artigu sira-ne’e mesak esensiál de’it atu regula lalaok ezekusaun OJE nian.
“Ami hatene iha lejislatura anteirór bainhira bankada Governu lori ba Tribunál hodi husu fiskalizasaun Tribunál nian kona-ba inkonstituisionál ba artigu, tuir ami hatene iha artigu tolu de’it mak Tribunál deklara inkonstituisionál. La sala, artigu 57, artigu 74 alínea 5 no artigu 95 alínea 2 ligadu ho saldu jerénsia, maibé iha alterasaun ne’e ita-boot sira lori kedas artigu hamutuk 18. Ne’ebé, ami hanoin, alterasaun presiza iha diskusaun kle’an, tanba ne’e se di’akliu hafoin OJE hotu mak lori alterasaun lei ne’e no seu todo hodi haree alterasaun ne’e didi’ak, tanba hanesan bankada opozisaun koopera atu hadi’a lei ne’e” nia hateten.
Deputadu FRETILIN, Antoninho Bianco, hateten lei ne’e importante tebes tanba ne’e presiza diskusaun kle’an ho tempu ne’ebé naruk.
Notísia Relevante: PN aprova proposta-lei enkuadramentu orsamentál iha finál global
Jornalista : Nelson de Sousa
Editór : Cancio Ximenes
