DILI, 20 agostu 2023 (TATOLI) – Komandu FALINTIL-Forsa Defeza Timor-Leste komprome sei kria kondisaun ba veteran sira ne’ebé sei ativu iha instituisaun F-FDTL molok implementa reforma.
“Reforma hanesan situasaun ida-ne’ebé militár no Estadu tenke prepara, hodi asegura kondisaun ho dignidade no seguransa ne’ebé kondiz ho vida ne’ebé dedikadu ba servisu. Tranzisaun ne’ebé neneik maibé naturál iha instituisaun Estadu nian. Ita tenke hanoin katak reforma mak tempu atu deskansa no refleta rezultadu husi ita-nia luta ba independénsia nasionál”, Tenente Jenerál, Falur Rate Laek iha nia diskursu durante serimónia komemorasaun aniversáriu FALINTIL ba dala-48 iha Kuartel Jenerál F-FDTL, Fatuhada, domingu ne’e.
“Ha’u apresia imi-nia demonstrasaun lealdade ba nasaun no dedikasaun ba ba imi-nia devér. Ha’u hanesan mós imi, komprende imi-nia sentimentu pertensa no susar atu husik instituisaun ida-ne’ebé imi dedika ona imi-nia moris tomak. F-FDTL sei kontinua halo buat hotuhotu ne’ebé iha ninia posibilidade no rekursu hodi asegura katak imi-nia bem-estar ka moris di’ak sei aseguradu”, nia afirma.
Falur apresia veteran sira ne’ebé agora daudaun ne’e sei servisu iha institusaun F-FDTL ho sira nian dedikasaun no loialidade hodi kontinua servi instituisaun F-FDTL.
“Ha’u hakarak sauda veteranu FALINTIL sira ne’ebé sei ativu iha Forsa Armada, maske hasoru dezafiu seguransa oioin ne’ebé nasaun ne’e hasoru”, nia dehan.
“Ita hotu tenke tau iha hanoin katak ita iha responsabilidade ne’ebé bo’ot atu servi instituisaun ne’e, maibé mós labele haluha katak ho tempu ne’ebé lao dadauk, ita-nia família mós presiza sente ita-nia prezensa hafoin tinan naruk halo servisu ita-nia rai“, nia adianta.
Tenente Jenerál husu ema hotu tenke kuda kultura respeita malu hodi respeita no apresiasaun terenu sira no servisu militár mane no feto sira, Timor-Leste sei la halai ses, hanesan mós esperiénsia iha mundu tomak.
“Síkulu moris vida ema nian lahatene lori tempu bainhira, hanesan mós militár sira muda ba situasaun ida-ne’ebé sira-nia ligasaun ho forsa armada ladún fiziku ona maibé sentimentál”, nia konklui.
Jornalista: Natalino Costa
Editór : Zezito Silva
