MAE: Autoridade Dili-Liquiça sobu baraka iha Tibar ho baze Dekretu-Lei Nú 33/2016
DILI, 29 agostu 2023 (TATOLI)—Ministru Administrasaun Estatál (MAE), Tomás do Rosário Cabral, hateten iha sesta (25/08/23) semana kotuk atuasaun forsadamente hosi Autoridade Munisípiu Díli ho Liquiça hodi sobu baraka komunidade ka negosiante 20-resin iha Tibar ne’e ho baze ba Dekretu-Lei Nú. 33/2016 kona-ba Jestaun Orden Públiku nian.
“Asaun forsada sobu baraka iha sesta 25 fulan-agostu 2023, halo operasaun hodi sobu obrigatóriu baraka 20 resin ne’ebé komunidade harii iha estrada ibun parte Tibar nian hodi halo sira-nia atividade negósiu hanesan faan ikan, modo no mós fa’an ai-fuan sira, tanba dalan boot nian ida-ne’e labele husik faan tnnba kapitál presiza moos no organizadu,” Ministru ne’e hateten ba jornalista sira, iha edifísiu MAE Caicoli, segunda ne’e.
Maibé komunidade protesta hasoru desziaun ne’e, Tomás do Rosário Cabral hatán, asaun forsada halo hosi autoridade munisípiu rua hasoru komunidade sira iha Tibar ne’e refleta ho klaramente iha Dekretu-Lei 33/2023, kona bá Jestaun Ordén Públika.
“Ne’e unidade ida iha autóridade iha Díli, ne’e dekretu-lei 33 ne’e em vigór hela. Autoridade sira mak tenke hatene. Ida-ne’e ami labele orienta beibeik. Ne’e Dekretu-Lei 33/2016, sobre jestaun ordém públika. Dekretu-Lei 33/2016 ne’e, autoridade munisípiu sira tenke uza sira-nia autoridade regula ida-ne’e. Se uza fuan, merkadu ho administrasaun kahor malu,” nia dehan.
Governante ne’e esplika, durante ne’e komunidade iha kapitál Dili, sempre taka estrada sira mak ahnesan ezemplu, área sira iha Comoro, parte Elemloi Delta nian, Ponte Rohan Becora nian no iha parte Audian, negosiante sira kuaze atu taka tiha estrada ne’ebé prezudika ema seluk nia direitu atu halo movimentasaun.
“Maibé ida ita-boot husu ne’e iha estrada boot, Otél Pelican Paradise nian, ita halo iha kraik, nia ba taka kalén, lakle’ur nia halo uma permanente ona, depois halo nusá. Mota Comoro nia ninin de’it mós halo permanente, bee mai lori depois fó sala Governu. Ne’ebé, ha’u hanoin, jornalista labele jeneraliza lalais buat ne’e. Imi halo fali, hanesan ami duni fali ema iha fatin ida-ne’ebé labele. Ne’e ordém públika. Tanba, sira-ne’e regula hosi lei, sira mós la manán buat ida,” nia hateten.
Komunidade kontinua faan ikan iha fatin públiku
Ministru Administrasaun Estatál, Tomás Cabral, hateten fatin faan ikan nian uluk halo hela iha área branca Cristo Rei nian no to’o agora jeleira aat hotu ona.
“Ida-ne’e uluk Estadu halo hela iha, maibé fatin sira-ne’e jeleira hotu no buat hotu sira soe tiha ona. Agora iha orsamentu retifikativu, atu halo fali iha Tasi-Tolu, maibé mós ita la kumpre nafatin. Ita dehan fatin ba sira faan iha dalan ninin ne’e laiha, be merkadu Manleuana ne’e Estadu lakon osan lubuk boot ida. Merkadu ema la uza ida. Ne’ebé, ha’u hanoin, ita presiza haree. Kuandu hakarak sai sidade, iha ordén. Agora, ida halo besik iha Pelican Paradise, ema ba sobu depois lakleur ita mai keixa to’o iha autóridade boot sira. Se ordém públika mak agora husik , ne’e sei sai boot liu,” nia dehan.
Jornalista : Osória Marques
Editór : Cancio Ximenes
