Negosiante Baoknana simu formasaun hosi IADE kona-bá planu negósiu no jestaun  

OÉ-CUSSE 05, setembru 2023 (TATOLI – Grupu negosiánte sira iha aldeia Baoknana, suku Bene-Ufe, sub-rejiaun Nítibe, hetan formasaun hosi ekipa Institutu Apoia Dezenvolvimentu Emprezariál (IADE) Rejiaun Administrativa Espesiál Oé-Cusse Ambeno (RAEOA) kona-bá oinsá atu kria rasik planu iha atividade negósiu ho jestaun ne’ebé di’ak.

Notísia relevante: MKAE-RAEOA selebra akordu entegra kompeténsia IADE ba Oé-Cusse

Koordenadór IADE Oé-Cusse, Edmundo Perreira de Jesus, informa, atividade formasaun ne’e IADE hetan apoia hosi Autoridade RAEOA liuhosi Sekretáriu Rejionál ba Asuntu Komérsiu no Indústria hodi realiza formasaun iha Baoknana durante semana ida, hahú segunda 05 to’o sábadu, 10 setembru 2023.

Tuir nia, intensaun hosi formasaun ne’e, atu hasa’e koñesimentu ba grupu negosiante sira iha nível suku no aldeia, nune’e bele aumenta sira-nia inisiativa oinsá kria planu no jestaun ne’ebé di’ak iha atividade negósiu nian.

“Tanba ne’e IADE iha papél importante atu kapasita ita-nia negosiante sira, maka tenki liuhosi formasaun sira hanesan ne’e, entaun durante semana ida nia laran, ami sei fokuliu kona-bá planu inisiíu hahú hosi ita nia negósiu, oinsa nia jestaun no kalkulasaun, tanba sei ita hakarak sai ema-ne’ebé negósiu  atu la’o ba oin  persiza hetan kuñesimentu hosi parte hotu nune’e ita-bele jere rasik saida mak ita hakarak halo iha ita-nia planu negósiu lor-loron” Edmundu Pereira, ko’alia iha Oé-Cusse, tersa ne’e.

Ermundu Pereira, informa, durante ne’e parte IADE fasilita ona formasaun iha fatin barak iha sub-rejiaun sira, liuliu iha nivél suku no aldeia alvu ba grupu negosiante sira.

“Iha sub-rejiaun Oésilo ita realiza ona iha aldeia Tumin, suku Bobometo, iha sub-rejiaun Pante Makasar ita realiza ona iha aldeia Manuimpena, suku Lalisuk, iha sub-rejiaun Nítibe hala’o iha aldeia Manan, suku Bene-Ufe, no daudaun ne’e ita kontinua iha Nítibe aldeia Baoknana, suku Bene-Ufe, ho totál partisipante kuaze na’in-100 ona maka hetan ona formasaun ne’e,” nia katak.

Iha biban ne’e, xefi aldeia Baoknana, Abrão Nuno, orgullu  tanba Governu bele halo formasaun ne’e ba komunidade sira iha nível suku no aldeia.

“Ami agradese tebes, tanba durante ne’e seidauk iha formasaun ida kona-bá ita-nia negosiante sira, liuliu iha área rurál, ha’u hanoin durante semana ida nia laran, ne’e oportunidade  ditak tebes ba komunidade sira oinsá bele aprende di’akliu-tán,” nia orgullu.

Notísia relevante: MTKI lansa kompetisaun negósiu inovativu iha Oé-Cusse hodi diversifika ekonomia baze

 Jornalista: Abílio Elo Nini

Editór: Evaristo Soares Martins