Atleta basketeból Oé-Cusse simu formasaun igualdade jéneru no asédiu seksuál iha desportu
OÉ-CUSSE, 06 setembru 2023 (TATOLI – Atleta basketeból hamutuk na’in-26 mai hosi klubu no asosiasaun sira iha Rejiaun Administrativa Espesiál Oé-Cusse Ambeno (RAEOA), simu formasaun durante loron rua hosi Federasaun Basketeból Timor-Leste (FBTL), hodi aprende kona-bá violénsia bazea jéneru no asédiu seksual iha desportu.
Notísia relevante: Osan $6,370.15 lakon iha Liga Nasionál Basketball
Sekretáriu Jerál Federasaun Basketeból Timor-Leste, Igildo Tilman, informa, formasaun ne’e nu’udar rezultadu kooperasaun entre UN Women ho Federasaun Nasionál Basketeból, ne’ebé hetan finansimentu hosi KOICA hodi organiza formasaaun ba atleta sira iha tinan 2023 ne’e.
“Entaun ita hahú iha Oé-Cusse, sei organiza eventu ida iha loron 7 setembru ne’e, objetivu oinsa atu inklui asuntu jéneru ba iha desportu, tanba basketeból sai nu’udar federasaun desportiva ba dahuluk inklui programa jéneru iha ajenda kompetisaun, kódigu konduta, regra internal sira, atu nafatin integra ba igualdade jéneru,” Igildo Tilman, ko’alia iha salaun Dominikana, Oé-Cusse.
Tuir nia, matéria ne’ebé aplika durante formasaun ne’e, maka violénsia bazea ba jéneru, liuliu prevensaun atleta sira liuliu ba asédiu seksuál.
Nune’e durante loron rua formandu sira sei aprende atu haklean koñesimentu ba atleta sira, depois la’ós aplika de’it iha sira-nia jogu, maibé bele aplika mós ba sira-nia moris, tanba iha materia sira-ne’e iha mensajén di’ak bele lori ba iha família no komunidade.
“Formadu sira sai hanesan ajente hodi promove igualdade jéneru, ida-ne’e maka objetivu loloos hosi formasaun ne’e, tanba durante ne’e iha kompetisaun barak, bainhira labarik feto-sira joga ema balu fó trosa ba sira, hanesan ema LGBTI sira, tan ne’e liuhosi formasaun sira-ne’e atu responde atleta sira katak, ema hotu hanesan iha igualdade, diferénsia iha jéneru maibé hanesan,” nia katak.
Sekretáriu Jerál Federasaun Nasionál Basketeból, hateten, kooperasaun ne’e iha asuntu tolu mak implementa, primeiru oinsa UN Women fó apoia federasaun nasionál basketeból atu kria-nia kodegu konduta nune’e bele regula jogadór sira inklui responsabél klubu no asosiasaun sira.
Segundu maka fasilita formasaun ne’e liu-liu ba violénsia bazea jéneru kona-bá violénsia hasoru feto no labarik feto sira, terseira maka halo kompetisaun basketbál iha Díli hahú ona iha loron 18 agusto, sei hala’o mós ba munisipíu tolu seluk, hanesan Oé-Cusse, Baukau ho Covalima.
Iha biban ne’e, Prezidente Asosiasaun Basketeból Rejiaun Oé-Cusse, Julio Mak, orgullu, ho prezenta federasaun bele aumenta koñesimentu ba atleta sira, nune’e iha futuru bele partisipa iha eventu rejionál no nasionál ho di’ak.
“Programa ne’e mai hosi nasionál, primeira-véz mai hala’o iha Oé-Cusse, hanesan asosiasaun iha Oé-Cusse, ami orgullu tebes tanba mai fó formasaun bá ita-nia jogadór sira, nune’e bele hasa’e koñesimentu ba atleta basketeból sira iha Oé-Cusse, tanba durante ne’e ladun iha formasaun entaun ita fiar katak ba futuru sira bele partisipa iha eventu rejionál nasionál ho di’ak,” nia orgullu.
Notísia relevante: SEJD-PNDS selebra akordu kooperasaun konstrui kampu komunitáriu iha suku sia
Jornalista: Abílio Elo Nini
Editór: Evaristo Soares Martins
