Projetu kanál irrigasaun iha Lifau atinje 60%
OÉ-CUSSE 06 setembru 2023 (TATOLI – Konstrusaun kanál irrigasaun ne’ebé Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Agrikultura, konstrui iha natar saku suku Lifau, daudaun ne’e nia progresu fíziku atinje ona 60% no futuru sei fasilita bee ba natar ektare 54.
Notísia relevante: Barajen Tono benefísia natar ektare 1.717 iha Pante Makasar
Sekretáriu Rejionál ba Asuntu Agrikultura, José Eta, informa, projetu kanál irrigasaun ne’e la’os proposta mai hosi komunidade maibé tanba nesesidade komunidade nian.
Nune’e Autoridade RAEOA liuhosi Sekretáriu Rejionál ba Asuntu Agrikultura, prevee iha planu asaun anuál 2023 nian, hodi konstrui iha tinan ne’e atu fasilita bee ba natar sira iha suku Lifau uza ba halai natar no to’os modo.
“Konstrusaun kanál irrigasaun ne’e nia distánsia metru 100 hodi responsde ba natar ektare 54, ho benefisiáriu hamutuk uma kain 100 iha suku Lifau, agora nia progresu servisu ne’e to’o ona 60%,” José Eta ba Tatoli iha Oé-Cusse, kuarta ne’e.
Nia informa, projetu ne’e ezekuta hosi kompañia Zaunar Unipesoál Lda ho valór kontratu $40,375.01, ho durasaun kontratu fulan haat, hahú agostu sei termina iha novembru 2023 ne’e.
“Ohin ha’u ho ekipa téknika sira ami ba halo fiskalizasaun, hodi haree direita konstrusaun ne’e la’o oinsa, nune’e mós ita aproveita enkoraja kompañia atu ezekuta presiza tuir kontratu no garante kualidade, tanba bainhira ita tama ona dezembru tempu udan, entaun persiza aselera molok udan monu rai komunidade sira tenki uza ona,” nia afirma.
Notísia relevante: PA RAEOA kolleta hare Membramo iha Pante Makasar
Jornalista: Abílio Elo Nini
Editór: Evaristo Soares Martins
