LAUTÉM, 07 agostu 2023 (TATOLI) – Governu liuhosi Sekretaria Estadu Komunikasaun Sosiál (SeKoms) deside extende kontratu konstrusaun torre Rádiu Televizaun Timor Leste (RTTL,ep) to’o fulan-dezembru tinan-2023.
Sekretáriu Estadu Komunikasaun Sosiál, Expedito Dias Ximenes, esplika, razaun extende tanba durante prosesu konstrusaun kompañia hasoru difikuldade mobiliza materiál relasiona ho klima inklui kompañia seidauk hetan sertifikadu hosi Ministériu Obra Públika kona-ba materiál konstrusaun.
“Ita hotu hein to’o iha fulan-dezembru projetu tolu ne’e bele finaliza hanesan iha Lautém, Ainaro no Bobonaro,” Sekretáriu Estadu Komunikasaun Sosiál hateten iha Alto Laleno, Maina II, kinta ne’e.
Projetu refere lansa iha fulan-marsu hetan difikuldade tanba kondisaun terrenu liuliu tempu udan hanesan iha Alto Laleno, Fleixa, Ainaro no Bobonaro nune’e governu deside extende ikus no kompañia kompromete sei finaliza to’o fulan-dezembru.
Tuir relatóriu, progresu konstrusaun torre refere totál pursentu 50, komposta hosi projetu fíziku pursentu 30 no mobilizasaun materiál pursentu 20, ne’ebé hahú konstrui iha fulan-marsu tinan ne’e.
Ekipa SeKoms hamutuk ho Ajénsia Dezenvolvimentu Nasionál (ADN), tékniku RTTL no autoridade lokál halo vizita ba fatin konstrusaun torre iha Alto Laleno ho objetivu atu hatene kle’an progresu serbisu hosi kompañia manán-na’in.
Torre tolu refere konstrui hosi Governu hodi alarga transmisaun kanál RTTL nian hanesan parte leste mak torre Alto Laleno, sentru súl iha Fleixa, Ainaro no sentru oeste iha Oepo Tapotas, munisípiu Bobonaro.
“Governu paga ona orsamentu dahuluk ba kompañia pursentu 20 hosi konstrusaun ne’ebé hala’o ona,” Expedito Ximenes akresenta.
Nia hameno ba autoridade suku hamutuk ho tékniku ADN atu kontinua fó atensaun nune’e projetu refere bele finaliza tuir kontratu ho kualidade.
Supervizór hosi kompañia Global Citra Tama, Kasmin Toba, agradese ba SeKoms tanba vizita direita terrenu no kompromete sei finaliza prosesu konstrusaun torre tuir durasaun kontratu iha fulan-dezembru tinan ne’e.
“Ita sei esforsu bele finaliza tuir trajetu,” Kasmin Toba hateten.
Kada torre fahe ba tolu, komposta hosi fatin transmisaun, torre no fatin jeradór, ho montante orsamentu ba konstrusaun tore tolu RTTL,ep hamutuk millaun $1-resin, ne’ebe konstrui hosi PT Global Citra Tama ho durasaun fulan-neen.
Jornalista : Natalino Belo
Editór : Evaristo Soares Martins
