BAUCAU, 08 setembru 2023 (TATOLI) – Prezidente Autoridade Munisipál (PAM) Baucau, Olivio ‘Bou-lesa’ Freitas, enkoraja feto sira prepara-aan hodi kompete ho mane sira iha eleisaun suku ne’ebé sei realiza iha fulan-outubru tinan ne’e.
“Laiha limitasaun ba sé de’it tantu feto no mane, sidadaun hotu-hotu iha direitu atu kandidata-aan importante orijinál hosi suku refere,” Prezidente Autoridade Munisipál Baucau informa ba Agênsia TATOLI iha Vila Nova, sesta ne’e.
Bou-lesa nu’udar Prezidente Autoridade ko’alia asuntu ne’e hodi enkoraja feto sira hola parte iha eleisaun suku liuliu prepara-aan hodi kompete iha eleisaun suku ne’e.
Prezidente Autoridade Munisípiu Baucau ne’e sei konvoka autoridade suku sira atu sosilaza lei suku, liuliu kona-bá prosesu eleisaun nian nune’e bainhira loke oportunidade kada kandidatura sira bele rejista lista.
Administrasaun Munisipál Baucau halo ona kontaktu ho Sekretariadu Tékniku Administrasaun Eleitorál (STAE) munisípiu hodi halo preparasaun hanesan resensiamentu eleitorál no baze dadus antes anunsia loron rejistrasaun ba kandidatura.
Munisípiu Baucau ba tinan-2023 ne’e sei hala’o eleisaun suku hamutuk 61 hafoin iha aumenta tan suku tolu kompostu hosi Builai, Caibada makasa’e no Werumata.
Alende ne’e, suku foun sira sei prepara mos espasu atu instala sede suku no kria kondisaun hanesan levantamentu dadus, resensiamentu eleitorál no baze dadus no fasilidade nune’e bainhira eleisaun prienxe ona rekizitu.
“Sei halo levantamentu tanba suku tolu refere fahe hosi suku tuan no seidauk hatene aldeia hira nune’e presiza hatene antes realiza eleisaun,” Bou-Lesa akresenta.
Autoridade Baucau konsidera eleisaun suku parte hosi preparasaun ba implementasaun lei podér lokál no desentralizasaun administrativa liuliu iha eleisaun munisipál ne’ebé governu sentrál planeia sei establese iha tinan-2024.
Tuir planu eleisaun suku sei realiza iha fulan-outubru ne’ebé Autoridade Munisipál nu’udar nain ba eventu refere no STAE fasilita tékniku tuir lei númeru 9/2016 kona-ba eleisaun suku.
Jornalista : Natalino Belo
Editór : Evaristo Soares Martins
