DILI, 13 setembru 2023 (TATOLI)–Diretora Jerál Toponomia no Organizasaun Urbana iha Ministériu Administrasaun Estatál (MAE), Maria Florindo, hateten karreta Bombeiru, Ambulánsia, Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) no ba ema ho defisiénsia fíziku sira la selu taxa estasionamentu.
“Bainhira veíkulu hirak ne’e utiliza atu ba situasaun sei la halo pagamentu ba taxa estasionamentu no ba sira-ne’ebé iha defisiénsia fíziku ne’e labele selu bainhira para karreta ka motor iha estasionamentu,” Diretora Odete hateten ba Tatoli iha salaun INAP, Comoro, kuarta ne’e.
Ida-ne’e estabelese tanba iha Rezolusaun do Governo Nú. 16/2016, kona-ba Polítika Nasionál Mobilidade Urbana, Dekretu-Lei Nú. 3/2017, 22 masu, kona-ba rezime zona estasionamentu durasaun limitada.
Iha Diploma Ministerial Nú. 48 MAE/MOPTC/2017, 04 agostu, kona-ba kriasaun zona estasionamentu durante tinan sira ikus, haree katak karreta, motorizada ka motór, motor roda tolu hetok sai barak mak halai estrada sira, liuliu karreta ho motór hirak ne’ebé uza hosi aglomeradu prinsipál iha Repúblika Demokrátika Timor Leste.
Tanba ne’e mak Dekretu-Lei ida-ne’e estabelese para atu regula kona-ba estasionamentu iha zona estasionamentu sira ho durasaun limitadu.
Estrada no fatin públiku hirak ne’ebé harí ona sinal, tuir lei, no iha ne’ebá bele para, durante períodu tempu ida hafoin selu tiha taxa no konsidera tuir dekretu-lei ida-ne’e.
Zona Estasionamentu ho Durasaun Limitadu sira-ne’e mosu hosi Diploma Ministeriál konjuntu membru Governu hirak responsável ba Administrasaun Estatál no ba Obra Públika, Transporte no Komunikasaun, maibé ida-ne’e dever Autoridade Munisipál no Administrasaun Munisipál Dili nian.
Enkuadramentu legál planu pilotu estasionamentu ba Zona A iha Suku Colmera, zona B iha Suku Motael no Zona C iha Merkadu Taibesi, planu estensaun estasionamentu iha zona D mak avenida Liberdade da Imprensa, Avenida 20 de Maio, Rua de Bemori no Rua de Santa Crus.
“Kreximentu ida-ne’e tanba ita-nia populasaun sira-nia poder kompara hetok sai boot no atividade ekonómika iha ita-nia país sai boot hodi hamosu dezafiu hirak foun relasiona ho mobilidade no sustentabilidade hosi ita-nia aglomeradu populasionál sira ne’ebé impoin intervensaun públika ida. Atu assegura hamenus uza veíkulu partikulár sira, hodi rekorre ba meiu hirak disponível iha transporte kolektivu pasajeiru nian sira, mak Governu hakarak estabelese zona estasionamentu ho durasaun limitadu,” nia dehan.
Iha fatin hirak ne’ebé tránzitu makaas liu no iha fatin hirak ne’e bainhira hakarak para veíkulu, motosiklu, siklomotor no velosipede sira sei hetan selu taxa estasionamentu nian.
Medida ida-ne’e, la’ós de’it atu buka tau iha orden fatin hirak ba estasionamentu meiu transporte ne’ebé buka fatin hodi para maibé mós atu organiza ema-ne’ebé para motór no automóvel sira arbiru de’it no hodi bele atualiza utilizasaun meiu transporte privadu.
“Nune’e dadus ne’ebé xefe departamentu Organizasaun Urbana relata iha fulan-juñu tinan ne’e hamutuk $2.337,35 hodi estasionamentu merkadu Taibesi, Avenida 20 de Maio, Avenida Liberdade Imprensa, ho zona Colmera nian,” diretora ne’e hateten.
Antes ne’e, Xefe Departamentu Asisténsia Urbana iha MAE, Abel Bere, hateten fulan-janeiru 2023 ne’e taxa estasionamentu hamutuk $2.008,15, fevereiru iha $1.618,60; marsu iha $1.102,80; abríl $2.778,65 no maiu $1.311,25.
Estasionamentu hahú estabelese iha kapitál Dili iha tinan 2017 to’o agora hatama reseita hamutuk $165.649.70, tinan 2017 iha $8.844.80, tinan 2018 iha $27.702.60, tinan 2019 iha $27.594.45, tinan 2020 iha $41.792.00, tinan 2021 iha $27.717.80 no tinan 2022 iha $31.998.05.
Jornlista : Osória Marques
Editór : Cancio Ximenes
