MAE kapasita ema 303 halo levantamentu dadus ba plaka iha Dili
DILI, 13 setembru 2023 (TATOLI)–Diretora Jerál Toponomia no Organizasaun Urbana iha Ministériu Administrasaun Estatál (MAE), Maria Florindo, hateten MAE kapasita formasaun ligadu ho asuntu toponomia no estasionamentu nian iha kapitál Dili ba ema hamutuk 303, hodi halo levantamentu ba dadus plaka iha Dili.
“Plaka sira iha Dili laran barak mak estraga no populasaun lahatene hodi baku sai no lori ba ne’ebé-ne’ebé, entaun ho IX Governu nia polítika liuhosi Estatál sai prioridade ida ba ami no iha loron 120 ne’e mós ami buka oinsá atu bele halo levantamentu dadus ida-ne’e. Tanba loron tolu ona (11-13/09/2023) hela iha INAP hodi fó formasaun ba ita-nia alin sira hamutuk 303. Hosi totál ema-ne’e feto mak barak liu, ida-ne’e hatudu feto joven mós hakarak kontribui ba dezenvolvimentu ida-ne’e,” Maria Florindo hateten ba Agencia Tatoli iha INAP, Comoro, kuarta ne’e.
Diretora Jerál ne’e hateten, objetivu hosi formasaun ne’e atu kapasita joven sira-ne’e hodi oinsá tun iha bairru sira hodi buka hatene plaka ne’ebé hetan estagu, no identifika ba fatin foun sira hodi monta fali plaka.
“Ita-nia objetivu hosi formasaun ba loron tolu ne’e mak ko’alia kona-ba asuntu toponomia no estasionamentu ba joven sira, atu nune’e ajuda sira halo levantamentu ba dadus iha Dili. Tanba, asuntu toponomia ne’e importante tebes atu monta no tau númeru uma iha kada aldeia, suku iha kapitál Dili. Nune’e, bele fasilita ita-nia komunidade hosi munisípiu ka bele fasilita mós ema estranjeiru ruma mai ita-nia rain,” nia dehan.
Nia esplika, servisu ne’ebé mak sira atu halo mak halo levantementu ba dadus plaka sira-ne’ebé aat no tenke deskreve iha ne’ebá katak iha aldeia no suku ne’ebé nian, no la’ós levanta de’it plaka maibé mós númeru uma sira, tantu estadu no komunidade nian inklui igreja, eskola, sentru saúde, eseptu rai mamuk.
“Servisu ida-ne’e todan, hasoru rai-rahun, loron manas, no hasoru ema oin-oin iha fatin servisu, maibé husu atu ita-boot prontu no servi rai ida-ne’e. No husu atu foka ba servisu no tenke ho responsabilidade no servisu ho pontualidade katak tuku 08h00 dader tenke iha ona fatin, no oras 17h30 mak fila uma.,” nia hateten.
Arruamentu iha Timor-Leste hamutuk 2013 ne’ebé kompostu hosi avenida iha 72, rua iha 564, Travessa iha 464 no Beco 913.
Hosi númeru ne’e barak mak aat no tohar ona, tanba nune’e ekipa ida-ne’e sei halo dezlokasaun iha fulan ne’e nia-laran, tanba sesta (15 setembru 2023) semana ne’e, sei husk sira no sei atribui sira-nai atributu nune’e bele hahú ona halo levantamentu dadus no sei ramata iha novembru tinan ne’e.
“Sesta agora ita entrega sira ba xefe suku, xefe aldeia, autoridade postu no polisia hodi halo akompañamentu ba levantamentu dadu. Sira sei la mesak maibé ho autoridade munisípiu Dili nian. Ha’u fiar no ho esperansa ba ita-nia joven sira katak tanba sira mesak hela Dili no hatene tuir lala’ok sira iha ne’e,” nia dehan.
Toponomia hirak- ne’e sei funsiona iha territóriu nasionál bazea ba dekretu-lei Nú. 29/2016, 13 jullu, Jurídico da toponomia e numeração de política.
Jornalista : Osória Marques
Editór : Cancio Ximenes
