PNTL konvida entidade hotu kontribui ba pás iha Baucau
BAUCAU, 13 setembru 2023 (TATOLI) – Komandu Polísia Nasionál Timor-Leste (PNTL) konvida entidade hotu atu hamutuk kontribui ba pás no dame iha munisípiu Baucau.
Liuhosi sorumutu kona-ba seguransa no estabilidade iha Baucau, Segundu Komandante PNTL, Komisáriu Polísia, Pedro Belo husu ba veteranu sira ne’ebé nu’udar rin ba nasaun atu nafatin luta hodi liberta povu hosi hahalok ema balun ne’ebé hakarak instabiliza Timor-Leste.
“Ha’u konvida ita-boot sira mai ita hotu serbisu maka’as no hadook aan hosi violénsia durante ita-nia moris tomak tanba rai ida-ne’e nia hakmatek sei konta mos hosi ita-boot sira-nia kontribusaun,” Segundu Komandante PNTL hateten iha Sentru Konvensaun Baucau (CCB, sigla portugés) Vila Antiga, kuarta ne’e.
Eis Komandante operasionál ne’e, husu veteranu no veterana sira atu nafatin hanorin doutrina patriotizmu no nasionalismu ba jerasaun foun liuliu juventude sira atu hadomi nasaun tanba lakohi ema seluk estraga estabilidade iha Timor-Leste.
Pedro Belo konsidera autoridade lokál sira iha papél inportante tanba besik liu ba komunidade nune’e presiza iha kontrola másimu hanesan identifika Organizasaun Arté Marsiál (OAM) no Organizasaun Arte Rituál (OAR) hanesan kolabora ho Ofisiál Polísia Suku (OPS) iha área seguransa.
Komisáriu Polísia ne’e husu ba lideransa OAM no OAR atu serbisu másimu hodi kontrola no aplika disiplina aas ba membru sira hosi munisípiu to’o aldeia atu kria pás no dame iha Baucau.
“Husu nafatin ita-boot sira-nia apoia tomak, ba KRAM hamutuk ho estrutura tomak tenke kontinua hala’o resensiamentu ba menbru sira,” Pedro Belo akresenta.
Informasaun ne’ebé PNTL hetan hosi KRAM nasionál katak too agora prosesu resensiamentu seidauk masimu tanba iha membru balun lakohi rejistu nune’e futuru bele difikulta prosesa kontrolu iha área seguransa.
PNTL kontinua prontu apoia ba prosesu resensiamentu ne’ebé halao hosi KRAM no husu atu entidade hotu kolabora ba dezenvolvementu rai doben Timor-Leste.
Pedro Belo husu mos ba inan-aman sira kontinua kontrola oan sira tanba formasaun edukasaun moral dahuluk sai hosi uma-laran liuliu fó hatene kona-ba buat di’ak no aat hahú hosi idade kiik nune’e bainhira joven bele aplika tuir dalan loloos.
Antes ne’e, mosu konfrontu entre membru organizasaun arté marsiál PSHT ho IKSP-TL ne’ebé hamosu pertubasaun orden públiku iha área Nagardjo, Bahu, Baucau Vila, ne’ebé rezulta uma rahun no pesoál balun kanek.
Totál organizasaun arté-marsiál ne’ebé rejista sub KRAM Baucau hamutuk neen kompostu PSHT, IKS, KORK, Padjajaran, Perisai Diri, THS-THM no Seruling Dewata.
Notisia relevante: Pedro Belo husu arte-marsiál no rituál hatudu konfiansa ba Governu
Jornalista : Natalino Belo
Editór : Evaristo Soares Martins
