OÉ-CUSSE, 19 setembru 2023 (TATOLI – Projetu gabiaun unidade rua ne’ebé Autoridade Rejiaun Administrativa Espesiál Oé-Cusse Ambeno (RAEOA) konstrui iha aldeia Oébaha no aldeia Tumin, suku Bobometo, sub-rejiaun Oésilo, daudaun ne’e nia progresu fíziku atinje 35%.
“Ha’u hamutuk ho Sekretáriu Agrikultura, no téknika sira hosi Obra Públika, ba halo fiskalizasaun ba projetu gabiaun tolu, ida iha Nunuheno ne’e iha área Pante Makasar nian servisu to’o ona 15%, no rua seluk harii iha sub-rejiaun Oésilo ida iha Oébaha no Noel-Ekat suku Bobometo nian, ne’ebé servisu la’o maka’as nia progresu ne’e to’o ona 35%,” Prezidente Autoridade RAEOA, Arsénio Paixão Bano, Tatoli iha Oé-Cusse, tersa ne’e.
Notísia relevante: RAEOA harii tán gabiaun lima ba suku haat ho kustu millaun $1-resin
Purtantu, projetu gabiaun iha Oébaha nia medida metru 400 hodi proteje natar ektare 28 ho benefisiáriu uma-kain 106, no konstrui hosi kompañia Elo Coet Unipesoál Lda ho kustu $188,696.03 ho durasaun kontratu durante fulan-neen.
Kona-bá projetu gabiaun Noél-Ekat nia medida metru 800, konstrui hosi kompañia Vanila Unipesoál Lda, ho kustu $458,294.18 ho durasaun kontratu durante fulan ualu (8).
Nune’e Autoridade RAEOA tau atensaun másimu kada tinan tanba iha liña fronteira, presiza proteje atu labele estraga natar no to’os sira-ne’ebé besik fronteira.
“Projetu ne’e atu proteje mota entre fronteira Timor-Leste ho Indonézia tanba mota sobu no estraga beibeik ita-nia rai komunidade sira, entaun ita tenke proteje ho gabiaun, iha tinan kotuk Autoridade konstrui gabiaun ida ho metru 500 no tinan ida-ne’e aumenta ba metru 800,” nia afirma.
Notísia relevante: Projetu rekonstrusaun Gabiaun atu proteje natar no to’os iha RAEOA
Jornalista: Abílio Elo Nini
Editór: Evaristo Soares Martins
