iklan

EKONOMIA, EDUKASAUN, MUNISÍPIU, OÉ-CUSSE (RAEOA)

PA RAEOA inaugura Eskola Bázika Filiál haat

OÉ-CUSSE, 22 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sesta ne’e inaugura Eskola Bázika Filiál (EBF) haat ne’eb’e harii iha fatin izoladu sira iha sub-rejiaun Pássabe, Nítibe no Pante Makasar.

Eskola haat ne’ebé Prezidente Autoridade RAEOA inaugura iha aldeia Ulas suku Taiboko no eskola sira-ne’e hanesan, EBF Aijaofukan iha suku Abani, EBF Palsam iha suku Malelat sub-rejiaun Pássabe,  EBF Fatukenfua iha suku Usitaku sub-rejiaun Nítibe no EBF Ulas iha suku Taiboko sub-rejiaun Pante Makasar.

Notísia relevante: Komunidade kontribui osan-materiál konstrui sala emerjénsia ba EBF ida iha RAEOA

Prezidente Autoridade RAEOA, Arsénio Paixão Bano, husu inan-aman sira atu kontinua enkoraza oan sira badinas ba eskola, tanba eskola filial haat ne’ebé foin harii alvu ba iha fatin izoladu sira, ho objetivu atu fasilita estudante sira bele asesu eskola ho distánsia besik.

PA RAEOA inaugura Eskola Bázíka Filiál haat ne’ebé harii Iha fatin izoladu. Imajen mídia ZEESM.

“Labarik sira ba eskola la persiza la’o do’ok ona, importante maka inan-aman sira iha ne’e, dudu oan sir aba eskola labele iha uma, entaun fatin tolu seluk, Faotkenfua, ita liu dala hira ona iha ne’ebá, eskola ne’e ladi’ak, reabilitas mós iha tempu uluk ho emerjénsia ladi’ak, entaun ita halo fali foun no reabilita ida, EBF Palsam ne’e do’ok tebes, ita hanoin parese Ulas-Lama mak izoladu, maibé Palsam ne’e izoladu liután, estrada mós laiha maibé Autoridade haree katak, eskola ne’e hotu ona no uza daudaun ona,” Prezidente Autoridade Autoridade RAEOA, Arsénio Paixão Bano ko’alia iha ámbitu serimónia inaugurasaun ne’e.

Tuir fali iha Pássabe kompañia Sufnentimo mak halo sala tolu iha EBF Aijaofukan, ne’e hatudu iha mudánsa maka’as, tanba fulan hira mai Autoridade sei hahú fali edifisíu foun, signifika Oé-Cusse nia eskola iha mudánsa maka’as ona, sentru formasaun ba profesór mós iha ona, importante ita labele hakiduk inan-aman korajen nafatin oan sira ba eskola.

Notísia relevante: Autoridade RAEOA prevista preokupasaun EBF Fatukenfua iha OJE 2023

Sekretária Rejionál ba Asuntu Edukasaun no Solidariedade Sosiál, Abelina da Costa, promete iha tempu badak parte edukasaun rejionál sei tau ona mobiliáriu ba eskola sira hodi fasilita estudante sira hala’o prosesu aprendisajén ho di’ak.

“Ami halo planu atu oinsa konstrui tán eskola hahú hosi 2021 depois COVID-19, ami iha ona aprovasaun ba eskola 14 ne’ebé remata ona tuir tán ami halo tan eskola, ne’e maka ohin ita inaugura fatin haat iha Ulas-Lama, kona-bá mobiliáriu meja kadeira, ita sei lori mai iha semana oin,” nia promete.

Xefes uku Taiboko Joaquin Tafin agradese tanba Governu liuhosi autoridade RAEOA iha inisiátiva atu identifika fatin izoladu hodi harii eskola, nune’e bele hakman viajén estudante sira bele asesu eskola ho besik.

“Lori komunidade nia naran, hakarak agradese ba Autoridade RAEOA, tanba iha inisiátiva loke ona eskola foun haat hosi sub-rejiaun Pássabe, Nítibe no Pante Makasar liu-liu suku Taiboko aldeia Ulas maka ohin ami simu ona, ami agradese tanba fó solusaun ba preokupasaun ne’ebé tinan barak komunidade sira infrenta liu-liu oan sira atu asesu ba eskola,” nia orgullu.

Entretantu, eskola EBF Palsam harii kompañia Lorotias Unipesoál Lda ho kustu $117,672.08, EBF Fatukenfua harii hosi kompañia Colomeob Unipesoál ho kustu $81,528.94.

Nune’e kompañia Sufnentimo Unipesoál Lda harii EBF Aijaofukan ho kustu $26,666.66, no EBF Ulas harii hosi kompañia Hunobahalku Unipesoál Lda ho kustu $58,760.11, orsamentu hirak-ne’e Autoridade RAEOA aloka hosi Orsamentu Jerál Estadu (OJE) tinan 2022 nian.

Notísia relevante: RAEOA aloka millaun $2-resin harii eskola foun 19 no hadi’a edifísiu rua

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!