Prezensa médiku australianu apoia profisionál saúde iha klínika Daitula
BAUCAU, 22 setembru 2023 (TATOLI) – Jestór Klínika David Alex Daitula agradese no rekoñese prezensa médiku australianu bele ajuda ona hodi halo atendimentu saúde ba veteran sira.
Koordenadór Klínika David Alex ‘Daitula’ Baucau, Leonel Guterres, esplika, prezensa ekipa médiku australianu hanesan parte kooperasaun entre veteranu Austrália ho Timor-Leste ne’ebé halo tratamentu saúde ba veteranu no komunidade iha Baucau.
“Ita-nia esperansa pelumenus kada períodu sira mai atu ajuda veteranu sira relasiona ho kazu (moras) ,” Koordenadór Klínika David Alex ‘Daitula’ hateten iha Vila Antiga, sesta ne’e.
Prezensa médiku estranjeiru refere tuir tempu hanesan kada fulan-tolu kada kada tinan ne’ebé hetan entuziasmu hosi veteranu no komunidade sira hodi kontrola saúde pesóal.
Alende halo tratamentu, ekipa refere sei halo mós observasaun ba fasilidade klínika Daitula hanesan infraestrutura inklui ekipamentu antes CMCLN prepara proposta hodi hetan fundu hodi hadi’a klínika veteranu Baucau.
Tuir planu, ekipa médiku australianu sira sei halo tratamentu ba faze daruak iha loron-25 abríl tinan-2024 nu’udar parte kontinuasaun halo tratamentu saúde ba pasiente ne’ebé kategoriza sofre moras todan hanesan presiza operasaun.
Ekipa médiku hamutuk ho veteranu Australia hamutuk na’in-25 mak prezensa iha klínika Daitula, komposta hosi doutór espesialista na’in-rua hanesan internista, médiku na’in-haat, enfermeiru no restante voluntáriu hosi sivíl no militár.
Notisia relevante: Médiku hosi Austrália halo tratamentu saúde iha klínika veteranu Baucau
Jornalista : Natalino Belo
Editór : Evaristo Soares Martins
