BOBONARO, 25 setembru 2023 (TATOLI) – Projetu Konstrusaun sala aula hitu iha Eskola Ensinu Bazíku Filiál (EBF) aldeia Anapal, suku Molop, postu administrativu Bobonaro, munisípiu Bobonaro konklui ona.
Infrastrutura edukativa refere sala haat konstrui liuhosi Asisténsia Povu Japaun iha tinan 2021 no sala aula tolu konstrui hosi Ministériu Edukasaun liuhosi projetu komunitária 2021ho totál kustu $114,527.05.
Notísia Relevante:Edukasaun Bobonaro presiza tán karteira eskolár 165 ba eskola foun
“Ohin ha’u ko’alia ona Ministra Edukasaun, eskola ita-nia governu halo nee, ita-boot sira bele uza ona, ida Japaun apoia ne’e hein lai,” Diretór Servisu Munisipál Edukasaun Bobonaro, Crispim Moniz, ko’alia hafoin halo observasaun direita ba eskola ne’e
Nia husu ba jerente eskola sira atu kontrola no kuida di’didiak aula foun hirak-ne’e nune’e labele hetan estragu.
“Imi tenke haree labarik, sira labele pinta arbiru parede sira-ne’e, depois vidru no hamoas eskola beibeik, halo lutu, ita-boot sira labele hein beibeik ba Governu, tanba Ministériu Edukasaun ne’e haree eskola hotu iha Timor laran tomak, barak mak sei aat, ita-boot sira agredese tanba tinan ida bele hetan eskola foun rua kedas ne’e,” nia katak.
Enkuantu iha diskusaun ho Diretór servisu Munisipál Edukasaun Bobonaro ho Koordenadór eskola no manorin-na’in sira mós relata katak, eskola prontu ona, maibé bee-moos mak seidauk iha, tanba antes ne’e kompañia ida fura, maibé retira fali tanba la hetan bee.
Enkuantu totál estudante iha EBF Anapál hamutuk 124 mai hosi primeiru siklu to’o terseiru segundu siklu, enkuantu estudante hirak-ne’e balu mai hosi munisipiu Covalima.
Notisia Relevante:ME sei konstrui-reabilita eskola 15 iha Bobonaro inklui EBC Tapo
Jornálista: Sérgio da Cruz
Editór: Evaristo Soares Martins
