Joven hetan tiru iha Lautem la iha desizaun atu opera ain
DILI, 26 setembru 2023 (TATOLI) – Médiku Jerál Ortopedika iha Hospitál Nasionál Guido Valadares (HNGV), Rogeiro Jose Pereira, hateten joven ida ne’ebé hetan tiru iha Munisípiu Lautem la hetan operasaun ba nia ain tanba pasiente ho kondisaun normál.
“Ohin dader, ami halo fali ezaminasaun no husu ba pasiente maibé ain komesa moras, ida ne’e ami haree oinsá ami fó tratamentu de’it no la iha desizaun ka planu atu opera tanba pasiente kondisaun normál”, Rogeiro Jose Pereira informa iha nia ka’ar fatin HNGV, ohin.
Tuir nia, pasiente daudaun ne’e baixa hela iha Departamentu Sirurjiaun HHNGV ho kondisaun estavél maske nia ain rua netan tiru.
“Pasiente ne’ebé mak hetan tiru iha Munisípiu Lautem daudaun ne’e baixa iha departamentu sirurjiaun, horseik ami halo segimentu ba pasiente to’o ohin loron ami haree pasiente ho kondisaun estavél tebes, nia la iha risku ba ameasa nia vida”, nia afirma.
Notísia relevante : Joven ida hetan tiru iha Lautem halo ona tratamentu iha HNGV
Ekipa konjunta konklui investigasaun oknum PNTL tiru joven iha Lautém
Jornalista : Felicidade Ximenes
Editór : Zezito Silva
