AMD destaka kazuál 120 ba fatin negosiante faan sasán iha espasu públiku
DILI, 27 setembru 2023 (TATOLI)–Diretór Servisu Munisipál Jestaun Merkadu no Turizmu, Arthur Henriques, hateten AMD hahú ona destaka funsionáriu kazuál sira iha fatin hamutuk 10 iha Dili, ne’ebé negosiante ambulante faan sasán iha espasu públiku ne’e, hodi halo kontrolu no fó seguransa ba negosiante sira.
“Iha loron segunda (25 setembru) liubá ne’e, ha’u simu funsionáriu kazuál hosi Sekretáriu Estadu Toponímia no Organizasaun Urbanu hamutuk 120 hodi ajuda fasilita ba área seguransa nian iha área risku sira hanesan negosiante ambulante sira okupa iha espasu públiku sira hanesan Kampung Baru, Elemloi, Bairru Pite, Motael, Largo Lecidere, Foho Osan Mean Audian nian, Fatuhada loja Meimart oin, eis merkadu Comoro, Tasi-Tolu no Becora II nian,” nia hateten ba Agência Tatoli, iha nia kna’ar fatin Matadoro, kuarta ne’e.
Nia dehan, entre funsionáriu kazual ne’e AMD mós planu koloka feto hamutuk 12 ne’e hodi halo apoiu ba patrollamentu iha kapitál Dili no área ne’ebé identifika hanesan risku ka nakonu ho negosiante ambulante oioin mak AMD tau ema 20 hodi kontrola.
“Ami koloka ema kuaze 20 iha Jardin Largo de Lecidere tanba iha ne’ebá ema soe lixu arbiru, faan ikan la tuir nia dalan no dala ruma faan okupa fatin públiku hodi kria engarafamentu ba movimentu karreta no ema. Na’in-12 iha Elemloi, Kampung Baru iha na’in-24 no iha Fofo Osan Mean nian, ita tau ema na’in-12. Depois Tasi-Tolu ho eis merkadu Comoro ne’e, ita tau na’in-lima (3) no seluk sei koloka iha Bairru Ppite, Motael, Fatuhada loja Meimart oin no Becora II nian, maibé ida-ne’e akompaña hosi ekipa taskforce no Polísia Nasionál Timor-Leste,” nia dehan.
Nia esplika, funsionáriu sira-ne’e sei tama tuir oras servisu nian ne’ebé iha no lorokraik tama to’o tuku 20h00 kalan.
“Kestaun ba ami mak kazuál sira-ne’e seidauk prodús kartaun identidade ba terrenu nian. Ida-ne’e sai preokupasaun no dezafiu ida ba ami maibé ami nafatin esforsu hodi ko’alia rekursu umanu atu kontaktu ba nasionál. Nune’e, aselera no posibilidade ami bele prodús provizóriu ida, nune’e bele uza ba servisu no ohin sira hahú tun ba terrenu,” nia hateten.
Jornalista : Osória Marques
Editór : Cancio Ximenes
