Administradór Manufahi husu MSSI kontrola subsídiu bolsa da mãe kondisionál
DILI, 29 setembru 2023 (TATOLI)—Administradór munisípiu Manufahi, Arantes Isaac Sarmento, husu Governu liuliu Ministériu Solidariedade Sosiál no Inkluzuan (MSSI) atu kontrola másima subsídiu programa Bolsa da Mãe Kondisionál (BdMC-sigla portugés).
“MSSI presiza iha kontrolu tanba dala barak liu osan ne’ebé benefisiáriu sira simu la’ós uza ba labarik sira ninia nesesidade eskola, maibé inan-aman sira uza fali ba buat seluk no ikus mai rezulta labarik barak mak la eskola. Tanba ne’e, husu ba MSSI atu kria polítika ida hodi oinsá mak bele kontrola komunidade sira, presiza halo kontrolu no akompañamentu,” Arantes Isaac hateten liuhosi nota ne’ebé Agência Tatoli asesu, sesta ne’e.
Programa ne’e di’ak no postitivu tebes, tanba ho reajustamentu ne’ebé mak iha bele ajuda mós komunidade no autoridade lokál sira bele iha intendimentu ne’ebé di’ak ba referénsia tanba iha komunidade barak mak seidauk asesu ba iha Programa bolsa da mãr kondisionál.
“La asesu tanba komunidade laiha koñesimentu no ida seluk mós tanba autoridade lokál sira ladún iha koñesimentu atu bele transmite ba iha komunidade,” nia hateten.
Administradór ne’e hatutan, programa bolsa da mãe kondisionál atu ajuda direta ba komunidade ne’ebé mak presiza tebes apoiu.
“Tanba implementasaun programa ida-ne’e ladún ba alvu ne’ebé ita hotu hakarak, signifika ema ne’ebé mak merese atu hetan labele hetan no ema ne’ebé loloos la merese atu hetan nia mak hetan fali. Maibé, liuhosi reajustamentu ida-ne’e mak foin ita bele hatene loloos katak ida-ne’ebé mak merese atu hetan no ida-ne’ebé mak la merese atu hetan. Ha’u ko’alia ida-ne’e tanba iha kada sesta ha’u sempre halo vizita ba komunidade, no ha’u haree komunidade barak mak moris vulnerável duni maibé sira la asesu,” nia dehan.
Ekipa reajustamentu MSSI, Leonito dos Reis, hateten objetivu importante reajustamentu ne’e mak oinsá bele hatene atinjimentu benefisiáriu sira-nian ba envolvimentu iha área edukasaun maibé ho reajustamentu ida-ne’e hatudu katak maioria labarik ho idade entre 5-17 ona ba edukasaun.
“Durante tinan barak MSSI la halo reajustamentu, tanba ne’e ho reajustamentu tinan ida-ne’e ha’u fiar katak, dadus labarik sira-ne’ebé mak foin moris sei aumenta barak liután,” nia hateten.
Totál benefisiáriu Bolsa da mãe kondisionál iha munisípiu Manufahi ne’ebé agora daudaun tama iha lista reajustamentu ne’e hamutuk 3.677, no iha suku Hola Rua rasik hamutuk benefisiáriu 365.
Jornalista : Osória Marques
Editór : Cancio Ximenes
